Hinog sa punoan

Gula 44

“Dili ko gustong maglaom ka sa wala, Nelson,” namulong si Urielle pagkilab sa pipila ka daklit. “Pangita na lang og laing babaye nga imong ikahulip sa akong dapit sa imong kasingkasing.”

Pagkabati ni Nelson sa maong mga pulong, huyhoy ang mga abaga niini nga mitindog ug nanamilit. Unya daw bug-at kaayo ang mga tiil niini nga nanaog sa pinuy-anan nila ni Urielle.

Dihang nakalakaw na si Nelson, misulod si Urielle sa iyang lawak. Midiretso siya paghigda sa lantay ug giumod ang iyang nawong sa unlan. Wala siya makapugong sa paghilak. Gitupsan ang iyang balatian sa kaluoy ni Nelson.

Miabot ang adlaw sa kasal nila ni Urielle ug Patrick. Nagdasok ug naghuot ang mga tawo sa Sto. Rosario Church sa dakbayan sa Sugbo. Gitambongan sa daghang mga dinapit ni Don Emilio Arcanghel ang ilang kasal. Nanambong usab ang mga kabanay ug suod nga higala ni Urielle.

Angayan kaayo si Urielle sa gisul-ob niyang boda nga gituyo gayod sa pagpatahe sa labing sikat nga tahianan sa dakbayan sa Sugbo. Misamot ang iyang katahom nga nagsul-ob sa maong biste sa kasal. Ang mga mata sa katawhan didto ra kaniya. Kaha, nakaingon sila nga suwerte siya nga nakabana og anak og sapian.

Apan sa kahiladman ni Urielle dihay naglublob nga kasubo. Gipaningkamotan lang niya nga dili kini mamatikdan diha sa labhag sa iyang panagway tungod kay dili siya buot nga mahisagmuyo si Patrick ug ang mga ginikanan niini kaniya. Mituyo ra ba gayod pagpauli sa Sugbo ang inahan ni Patrick nga atua na magbase sa United Kingdom aron pagtambong sa ilang kasal. Mao nga kutob sa mahimo, gipaningkamotan niya nga makita sa katawhan nga misaksi sa kasal nga malipayon siya. -- Sumpayan pa