Hinog sa punoan

Gula 43

“Apan ngano man?” Sukit ni Nelson. “Nahigugma ka man kaha nako?”

“Tinuod kana. Pero dili na ko makasibog sa gikasabotan tali sa amahan ni Patrick ug sa akong mga ginikanan. Unsa man unya’y ikasulti sa amahan ni Patrick kun layasan ko ang iyang anak? Unsa man kahay buhaton ni Don Emilio sa akong mga ginikanan sa higayon nga dili ko motuman sa among gikasabotan?”

Si Nelson na usab ang wala makatingog. Miduko kini sa atubangan ni Urielle. Mibuhig lawom nga panghupaw uban ang pagpanglingo. Natugkad ni Urielle nga ingon sa nahisagmuyo pag-ayo ang ulitawo.

“Hinaot unta, Nelson,” ni Urielle pa, “nga makasabot ka sa akong bahin.”

“Apan mag-unsa na man lang ang atong gugma?” Sukmat ni Nelson.

“Dawaton na lang nato ang kamatuoran nga tingalig dili gayod kita alang sa usa’g-usa.”

“Dili ingon niana kasayon ang pagdawat sa kamatuoran, Urielle.”

“Nasayod ko, Nelson. Apan wala na kita’y laing mahimo pa, gawas sa pagdawat sa kamatuoran tungod kay gikinahanglan ug dili kalikayan.”

Wala na usab motingog si Nelson. Nakita ni Urielle nga napahit sa ulitawo ang ngabil niini. Dili mabanabana ni Urielle ang kasakit nga gibati sa ulitawo niining higayona. -- Sumpayan pa