Ang iro ni Sarhento

Mo-lima na ka tuig nga nadestino sa Basilan si Sgt. Nicomedes Diez. Daghan nang mga kumbate batok sa mga bandidong Muslim ang iyang naagian ug swerte kay wa pa siya maintemano sa igo sa bala.

Usa ka adlaw niana, samtang paingon siya sa suba aron maligo, hisugatan niya ang usa ka tiguwang babaye.

"Undo, ako ning ihatag nimo ang akong itoy kay di nako maato og pakaon tungod sa kadaghan na nila sa among balay," matud sa tiguwang nagkugos sa itoy nga laki bulok puti ang balhibo niini.

"Salamat kaayo Iya. Morag buotan ning itoya, da. Ambi kay akoy mobuhi niana. Ganahan man sab ko’g iro. Aniay bayente pesos imoha na kini aron ipalit og makaon. Wa man gud ko'y lain kwarta sa bulsa sa akong short."

"Igo na kini Undo. Salamat lang usab. Wa ko kana ibaligya, ha? Di ko mobaligyag mananap nga sama sa itoy kay buotan nang matanga sa hayop. Bisan imong patiran, pero ayaw lang gyud buhata, moduol lang gihapon ug motilap pa sa imong kamot."

"Tinuod kana, Iya. Mao bitaw'ng ganahan kong mobuhi og iro."

"Na hala, Undo, adto na ko kay taas nang adlaw."

Maayong pagka-atiman ni Sgt. Diez ang itoy nga ginganlan niya’g si Listo hangtud nga midaku-daku ug sa dihang mipauli siya sa ila dinhi sa Sugbo aron mag-R & R kon rest and recreation, gida kini niya kay wa siya mosalig sa kauban niyang binlan sa mananap.

"Kanindot gud niining iroa nga imong da, Nico. Unsay ngan niya? Ibilin ni ha?" nagkanayon ang asawa sa Sarhento nga si Pam.

"Sige, pero atimana gyud ni si Listo Pam kay pinangga na nakong iroa ug buotan. Magdug gani mi didto sa kampo, puli nimo. He he!" tubag ni Nico dang komedya.

Nanglabay ang mga adlaw ug mibalik sa Basilan si Sgt. Diez pagkahuman sa iyang bakasyon. Usa ka hapon niana, may operasyon ang ilang pundok batok sa mga bandidong Muslim sa usa ka daw kalasangan nga dapit sa Basilan. Talisawop na ang adlaw ug samtang padung sila balik sa ilang kampo kalit silang gi-ambusan sa mga kaaway.

Nagpaka-paka ang mga buto sa nagkadaiyang armas sa masigkapundok. Nag-iyahay sila’g pangitag kapanalipidan ug sa paminaw sa sarhento daghan ang miatang kanila ug ubay-ubay sa iyang mga kauban ang nangligdas nga wa nay kinabuhi.

Tungod sa katag-as sa kasagbutan ug daghang kakahoyan pun-an pa gyud sa kangitngit nga misugod na pagtabon sa maong dapit, naglisud na sila kun asang dapita mopaingon nga way peligro.

Samtang naghunahuna og paagi ang sarhento nga maoy nangulo sa pundok, kalit may nakita siyang puti nga iro di layo sa ilang nahimutangan ug sinati kaayo niya ang bayhon niini.

"Oy, morag si Listo man kanang maong iro? Nganong miabot man siya dinhi nga atua man unta siya sa Sugbo?" ni Nico pa sa iyang kaugalingon.

Hinay kining giduol ni Nico, hinay usab kining milakaw ug maoy ilang gisundan. Taud-taod nilang sunod-sunod sa maong iro hangtud nakagawas sila sa siot nga dapit ug nakita nila ang gamay'ng kahayag sa unahan.

Mga kauban, mao na kini ang agianan paingon sa atong kampo. Salamat sa paggiya sa iro kanato. Pero, hain naman kadto nga kalit man lang nawagtang?"

Labihang lipaya sa mga kauban sa sarhento nga naluwas sila og wa nay kuyaw sa mga miatang kanila.

Nianang pagkaugma, nakadawat ug suwat si Nico gikan sa iyang asawa nga namatay ang ilang iro nga si Listo kay naligsan sa usa ka sakyanan.

"Kun mao, may espiritu kaha ang mga mananap ug si Listo ang pinangga nakong iro maoy mitabang kanamo nga maluwas sa among mga kaaway?" nakatuaw siya sa iyang kaugalingon. (Katapusan)