Hinog sa punoan

Gula 40

“Ikaw nay maantigong mopasabot kaniya,” matud sa iyang inahan. “Pasabta siya sa hinungdan kun nganong magpakasal ka kang Patrick.”

Sayon ra kaayo ang instruksiyon sa iyang inahan apan alang kang Urielle, lisod kaayo kining buhaton. Nasayod siya nga makugang gayod si Nelson sa higayon nga masayod kini sa nahitabo. Nakaseguro siyang maglisod gayod pagdawat si Nelson sa kamatuoran nga dili makabaton og katumanan ang ilang gugma.

Migawas siya sa iyang lawak ug miadto sa sala. Iyang natukmaan si Nelson nga naglingkod. Mitindog kini pagkamatikod sa iyang pagduol.

“Maayong gabii, Urielle,” nangatahoran ang ulitawo.

“Maayong gabii sab, Nelson,” mibalos pagtimbaya si Urielle.

Mibalik paglingkod ang ulitawo. Milingkod si Urielle sa atbang sa gilingkoran niini.

“Sorry nga wa ko makabisita nimo niadtong miaging semana,” nagkanayon si Nelson. “May mahinungdanon kong gibuhat didto sa Naga.”

“Okey lang, Nelson,” matud ni Urielle. “Maayo hinuon nga nahianhi ka karon. May mahinungdanon kong isulti nimo.”

“Unsa kana, Urielle?” Sukit sa ulitawo.

Wala dayon motubag si Urielle. Wala siya masayod kun unsaon niya pagsugod sa pagpadayag sa buot niyang isulti ngadto ni Nelson. Lisod alang kaniya ang pagpasabot sa ulitawo. -- Sumpayan pa