Ug giugbok ang dakong krus

Ang Ginoo maanaa kaninyo, ni Padre Pedro Valderama pa nga mipahigayon sa labing unang misa sa ilang paghidangat sa Sugbo niadtong Abril 14, 1521 uban ni Ferdinand Magellan ug mga sakop niini.

“Ang Ginoo maanaa usab kanimo,” tubag usab sa mga lumad nga mitambong nga gipangulohan ni Raja Humabon ug Rayna Juana.

Dili makatuo si Padre Valderama sa iyang nakita nga ingon niadto ang ipakitang kainit sa mga lumad sa pagsagop sa Kristiyanismo bisan sa hamubo lamang kaayong panahon sa ilang pagpasabot niini.

Ang tinuod dili tiaw ang gibati nga kabalaka ni Padre Valderama ang ilang paghidangat sa maong dapit sanglit maoy iyang pagtuo nga abogon sila pahilayo sa mga lumad sa ilang paghidangat sa maong dapit.

Apan nasayop ang pari sa iyang pagtuo tungod kay gisugat man sila sa mahigalaon ug maabiabihon nga mga lumad ug giandaman pa og lamiang pagkaon nga nakatambal kaayo sa gibati nilang kagutom.

Si Rayna Juana maoy nag-awhag sa mga lumad sa pagpabunyag ug sa pagtambong sa misa nga gihimo ni Padre Valderama.

Gisugilon niya ngadto sa mga lumad ang iyang kasinatian uban sa imahen ni Senyor Santo Niño nga gigasa kaniya ni Magellan.

Nakita niya nga giputos og talagsaong kahayag ang sulod sa iyang lawak diin usab niya ipahimutang ang maong imahen. Talagsaon iyang gibati nga maoy nakaaghat kaniya sa pag-awhag usab sa mga lumad sa ilang dapit sa pagpabunyag ug sa pagtambong sa labing unang misa nga gihimo ni Padre Valderama. 

“Sige,” mimando si Magellan sa iyang mga sakop nga nagpas-an sa dakong krus human sa gipahigayong misa ni Padre Valderama. “Dinhing dapita nato i-ugbok ang dakong Krus.” “Ang krus nga maoy magtiam dili lang sa atong paghidangat dinhi sa maong dapit kon dili sa atong pagka binunyagan ubos sa atong pagpasilong sa landong sa pagtuo sa relihiyong Romano Katoliko.”

Miduol ang mga sakop ni Magellan nga nagdala og kahimanan alang sa pagkawot sa yuta. Mitapok usab sa maong dapit sila si Raja Humabon ug Rayna Juana uban sa mga lumad sa pagtapok niini.

“Sige,” dugang mando ni Magellan ngadto sa iyang mga sakop human sa pagkawot sa yuta.“Tabangi sa pag-alsa ang dakong krus alang sa pag-ugbok na diha sa yuta nga inyong gikawot.”

Giyayongan sa mga sakop ni Magellan ug ilang giugbok ang dakung krus sa pagpabarog niini sa maong dapit. (Katapusan)