Tsiks killer

Mibiya sila si Mar ug Vivian sa TOPS. Gisubay nila kadtong karsada paingon pa gayud sa bukid. Gusto ni Mar nga malingaw g’yud si Vivian sa ilang pagpanuroy niadtong maong adlaw.

Sanglit kusgan man kaayo ang motorsiklo nga gigamit ni Mar wala siya maglisud sa pagtungas bisan sa mga gagmay’ng dalan-dalan aron mahiabut sila sa dapit sa bukid nga gusto nilang adtoon.

Sa tanto nilang suroy-suroy sa bukid naagian nila ang gamay’ng tyanggihan kon tabo nga nahimutang sa sitio Cantipla, sakop na sa barangay Tabunan. Dunay mga pagkaon nga gibaligya. Nangaon sila si Mar kay ala-una pasado na.

“Unsa man Vian, gusto ka pa nga manuroy pa ta sa ubang lugar dinhi sa bukid?” gisukna ni Mar si Vivian. “Ikaw la’y mag-igo Mar, agad lang ko nimo,” dali nga tubag sa dalaga.

“Mao ba, kun ako ang imong pagbut-on gusto na ko nga adto na ta sa akong giingon nga makaparayeg g’yud ko nimo’g maayo,” matud ni Mar nga nagngisi. Nakasabut si Vivian sa gipasabot ni Mar.

Misakay dayon si Mar sa motorsiklo ug misunod usab sa pag-angkas si Vivian. Gipasirit dayon ni Mar pagpadagan ang motor lugsong sa kadalanan paingon sa dakbayan.

Sa kakusug sa dagan sa ilang gisakyan, migakus si Vivian sa hawak sa radio announcer. Nabatyagan ni Mar nga ang atubangan nga bahin ni Vivian ingon sa mipilit sa iyang sampot, samtang ang dughan didto usab sa iyang buko-buko.

Ingon sa naghigwaos na si Mar sa sunod nga panghitabo. Sigurado siya nga kun maromansa lang niya si Vivian, sama sa ubang babaye nga iyang naagian dili na g’yud kini mobalibad nga angkonon niya ang iyang pagkababaye.

Wala abti’g tunga sa oras, nahiabut na sila dinhi sa siyudad. Midiritso si Mar sa V. Rama diin dunay usa ka motel nga dili kaayo bulgar sa uban.

Sa wala pa mosulod si Mar sa entrance sa motel, gilingi usa niya kun wala bay mga sakyanan nga nagsunod nga posibleng ang mga sakay nakaila kaniya. Dayon diretso na siya nga miliko ug misulod.

Nabantayan ni Mar nga gisalipdan ni Vivian ang iyang panagway dihang gitan-aw sila sa roomboy nga misinyas kanila nga pasudlon sa Room 107. Gisulod ni Mar ang motor sa grahe sa kwarto ug diha-diha nga gisirad-an kini sa roomboy. Walay tingog si Vivian. ”Nahadlok ka ba Vian?” gisukna ni Mar ang dalaga. ”Wala man, basta wala ta’y dautang buhaton ha,?” matud ni Vivian.

”Aw, sure Vian, gusto lang ko nga makaparayeg g’yud nimo’g maayo,” giagbayan dayon ni Mar si Vivian ug nanaka sila sa hagdan kay tua man sa taas ang kwarto sa motel. (Sumpayan)