Anino sa Kulto

Apan ingon sa wala pa matagbaw si Carlo. Nangita siya’g laing kapahungawan sa iyang kapungot. Ang tangke sa gasolina sa awtong itom gipunting niya sa Uzi. Ug halos dungan sa paglanog sa butobuto, miulbo ang sakyanan ug miukyab sa kahanginan ang kalayo ug aso nga lagom ang pagkaitom.

Paglabay sa pipila ka daklit, nakadungog siya’g siyaok sa siren sa sakyanan sa kapolisan. Nagsingabot kini sa iyang nahimutangan. Nagpabilin siyang nagbarog sa tunga-tunga sa karsada. Ang duha ka sakyanan sa kapolisan diha gyud mohunong sa iyang tungod. Abtik nga nanganaog ang mga awtoridad. Si Lt. Valera ang nangulo kanila.

“Men,” ni Valera pa. “Search the area.”

Milihok dayon ang mga tinugyanan sa balaod. Si Lt. Valera miduol kang Carlo.

“Wa ka ba maunsa, Sir?” pakisusi ni Valera.

“Okey lang,” ni Carlo nga mipahid sa dugo sa iyang bukton. Karon pa siya masayod nga nasamad na diay siya. Wala na niya madiparahi kun unsay nakasamad sa iyang bukton. Maguwang lang og diyotay sa garas. “Wala kini kaso.” Gihukman ni Carlo nga ang unom ka tawo nga iyang napatay pulos gayod mga sakop sa Tambayawan Black Brotherhood. Dihang gihiling sa kapolisan, nakaplagan nga pulos may patik ang ilang mga bukobuko. Ang gipatik mao ang hulagway sa usa ka dragon ug sa ubos nahisulat ang numero nga 666. Mao kini ang simbolo nga gisagop sa kulto. Apan nasuta nga dili sila lumad nga taga Mabini. Walay nakaila sa unom ka sakop sa kulto nga napatay ni Carlo.

Napatay na kaha niya ang mga tawo nga nagpatay sa iyang mga ginikanan? Maglisod si Carlo sa pagtubag sa maong pangutana. Lisod pa kaayo kining sutaon sa pagkakaron.

Si Maj. Dick Campo ingon sa mao hinuon ang gikuyawan nga naghunahuna sa nahitabong panag-engkuwentro tali ni Carlo ug sa mga sakop sa Kulto. -- Sumpayan pa