Giguyod sa batang kulot ang anak sa ungo

Desisayis anyos na si Mario ug bayong na siya. Apan nahibulong siya sa mga tinagdan sa iyang silingan nga morag dili kaayo motimbaya kaniya sa matag higayon nga iya kini silang hisugatan sa dalan. Bisan gani ang mga susama niya’g panuigon nga mga bayong na usab medyo dili kaayo motagad kaniya.

Maglikay sila kaniya ni Mario. Hinuon, duna may usa ka silingan niya nga suod kaayo niya. Kini si Betong mao gyoy mosangpit niya o di ba adtoon siya sa ilang balay. Dugay na silang suod nga managhigala nga nagsukad pa sa elementarya pa sila.

"Ingon ana man gyod na sila, sukad pa man niadto, Dong Mario," ni nang Sabel pa nga mitan-aw sa binuksang bentana ug milagbas ang iyang panan-aw sa gawas -- didto sa naglugitom nga kangitngit sa kagabhion.

"Mga lain kana sila’g mga batasan, Undo," ni tatay Osting pa pod niya kinsa nagpadayon sa paghigop sa kape diha sa tasa nga iyang gikuptan.

"Lain kaayo, uy, nga kun ako gani silang sangpiton medyo dili gani hapit motingog," may kasubo sa tingog ni Mario.

Wala na lang motubay sila si Osting ug Sabel. Gipadayon nila ang ilang mga buluhaton sa kusina. Unya, usa ka hapon samtang nagkaistorya sila si Betong iya gyud kining gipangutana ug gisultihan sa mga dili maayong lihok sa ilang silingan kanila nga dili na managad ug likayan na sila.

"Tungod sa tabitabi, Bay Mario," mubong tubag ni Betong. "Ako gani, mora’g katuhoon na hapit apan kay suod lagi kaayo tang amigo maong wala gyod ko matay-og sa maong tabitabi. Alang nako, dili na tinuod..."

"Unsa bang tabitabia na, Bay Betong?" nagpakisayod si Mario.

"Nga kamo, Bay Mario, kaliwat og ungo. Kay kana si nanay nimo kuno Sabel, anak ni anhing Agustina nga mamalbal og tawo ug daghan nang giabat ug gibalbal," miigham si Betong. "Mao nay tabitabi dinhi sa atong baryo bahin ninyo, Bay. Pangutan-a kuno sila si tatay Osting ug nanay nimo Sabel, kun unsa kini ka tinuod..."

Namuwa ang nawong ni Mario nga ingon sa gibati og kauwaw human niya mabati ang gisulti ni Betong kaniya. Tuod, iyang gisultihan sila si tatay ug nanay niya bahin sa tabitabi nga sila nga kaliwat og mangtas nga ungo.

"Oo, dong Mario, tinuod na, ungo kadto si Lola nimo Agustina ug ang mga ginikanan ni tatay nimo Osting kaliwat pod og ungo," ni nang Sabel pa   nga wala motan-aw sa anak. "Ikaw gani, inig abot sa edad nimo nga bayinte uno mahimo ka unyang mangtas sama namo..."

"Dili, dili ko gusto nga maparehas ko ninyo, Nay, Tay," kahilakon si Mario. Apan wala siyay mahimo kay kaliwat gyod diay nila nga mga ungo. Busa, usa ka adlaw nakigkita siya kang Betong ug iyang gisultihan sa iyang problema. Misabot pod intawon ang suod niyang higala ug mitambag pa kini kaniya. "Ugma, Bay Mario, adto sa Basilica del Santo Niño, kay Bisperas man sa iyang kapistahan..."

"Mag-unsa man ta didto, Bay Betong?" Miiknat ang kilay ni Mario nga mitan-aw sa higala.

"Mangayo ta’g tabang ni Senyor Santo Niño. Basin diay og dili na mapasa diha nimo ang kabilin sa pagka ungo," ni Betong pa nga ingon gibati’g diyotay'ng kahadlok nga naghunahuna nga si Mario diay kaliwat gyod og ungo.

Unya, dihay batang kulot nga mitumaw pagkalit ug giguroy si Mario paingon sa sulod ug gidala pa gyod kini sa may Shrine sa Mahal nga Patron sa Sugbo nga si Senyor Sto. Niño.

"Dali sunod kanako,Mario," niini pa nga nakaila kaniya. "Isoga gyod ang imong kaugalingon kay karong taudtaod, mosuka ka ug molit-ad sa kasakit sa tibuok mong kalawasan. Human niini, mahanaw na ang gahom sa yawa nga naa sa imong lawas..."

Sama sa gisulti sa batang kulot kalit lang nga midigwa si Mario ug misuka siya taman sa ginhawa ug milit-ad siya sa kasakit ug unya nakuyapan siya.

Pagkamatngon niya’g buot maoy nasipong sa iyang panan-aw ang batang balaan nga naa sa sulod sa iyang Shrine nga nagpahiyom kaniya. Mituo siya sa gahom sa Senyor. Ug namauli sila ni Betong. Pagtangkod ni Mario sa edad nga bayinte anyos, nahibulong sila si nanay niya Sabel ug tatay niya Osting nga wala man gyod siya mahimong usa ka mangtas nga ungo. Sa hilom nagpasalamat si Mario sa gahom ni Senyor Santo Niño, ang patron sa Sugbo. (Katapusan)