Hinog sa punoan

Gula 37

Dili ka magbasol sa gihimo mo’ng desisyon, Urielle,” matud ni Nang Marciana. “Nakaseguro ko’ng dili ka daugdaogon sa anak ni Don Emilio. Nasuheto kita sa kinaiya ni Sir Patrick. Ikaw mismo nakaila kaniya.”

Wala gihapon motubay si Urielle sa gisulti sa iyang inahan. Pero misantop sa iyang hunahuna si Patrick. Bisan dili kaayo suod sila si Patrick apan nasayod siyang buotan kini. Namatikdan gani niya nga buot unta nga makigsuod si Patrick kaniya apan siya ang milikay. Mauwaw siyang makigsuod ngadto sa ulitawo tungod kay anak lang siya sa saop sa amahan niini.

Iyang natimbangtimbang karon nga dili lisod higugmaon ang lalaki nga sama kang Patrick. Apan siya? Dili kaha usab maglisod si Patrick sa paghigugma kaniya sa higayon nga magminyo na sila? Unsa man kaha unya ang mahitabo sa ilang kaminyoon? Unsay dagan sa ilang panagtiayon?

Paglabay sa tulo ka adlaw nahibalik si Don Emilio Arcanghel sa pinuy-anan nila ni Urielle kuyog na si Patrick. Maoy gusto ni Don Emilio nga masabotan gilayon ang kasal nila ni Patrick ug Urielle. Nasayod na si Noy Sidro nga misanong na si Urielle sa gitanyag sa agalon niini kanila.

Una kining higayon nga nagkaatubang sila si Urielle ug Patrick isip kaslonon. Gibati ni Urielle ang tumang kabakikaw. Dili siya komportable ilabi na nga nakigtupad ang ulitawo kaniya. -- Sumpayan pa