Ang milagro ni Senyor Santo Niño

Nagkusmod ang panagway ni Padre Gally Leo nga migawas gikan sa buhatan ni Monsenyor Ernie Amatiaga. Daw wala kini mahimuot sa gipahibalo kaniya nga ibalhin sa laing parokya nga nahimutang sa halayong isla.

Si Elesio nga iyang sakristan nga nagpaabot kaniya sa gawas sa buhatan daw gibati og katingala sa iyang nakita sa pari. Nagdali siya nga mibarog sa gilingkoran ug misugat kini sa pagtimbaya.

“Adto na ta, Dre?” ni Elesio pa nga nangutana sa pari. “Oo,” sa pari pa nga miyanghag sa pagtan-aw kang Elesio. “Panghiposa ang atong mga gamit kay mugikan ta karon dayon.”

“A-asa, man ta Dre?” nakapangutana si Elesio sa pari.

“Adto ta sa Isla Caligatos,?” daling tubag ni Padre Gally Leo. “Ibalhin ko didto og distino sa arsobispo.”

Sa nasayran ni Elesio sa pamahayag ni Padre Gally Leo, natubag usab ang gibati niyang katingala nga nagtan-aw sa pari sa paggawas niini gikan sa buhatan sa arsobispo.

Layo ang maong isla ug lakip usab siya dili ganahan sa maong dapit apan wala siya’y mahimo gawas sa pagsanong sa gisugo ni Padre Gally Leo kaniya.

Mingaw ang maong dapit ug ang mga tawo daw wala’y pagpakabana sa pagsimba sanglit atua lamang kini magyampungad sa nagkadaiyang sugal nga naglakip sa hantak, tong-it, tigbakay ug inom sa ilimnong makahubog.

Nakita ni Padre Gally Leo si Elesio nga nag-inusara sa pagpanglimpiyo sa sulod sa simbahan nga maoy hinungdan sa pagtabang niini aron dali kining mahuman sanglit mohimo siya sa labing unang misa niadtong higayona.

Gipahimutang sa pari ang imahen ni Senyor Santo Niño sa altar sa maong simbahan ug gisugdan gilayon ang labing unang misa nga napulo lamang ka tawo ang mitambong niini.

 “Tokkk!!!” nabati ni Padre Gally Leo ang kusog nga tuktok sa pultahan.”Dre,!” sampit ni Elesio kaniya nga maoy nanuktok. “Pagmata, Dre!”

Nagdali sa pagbangon ang pari sa iyang gihigdaan ug giablihan ang pultahan.

“Ngano?” ni Padre Gally Leo pa nga gibati og katingala.

“Ang Santo Niño,” ni Elesio pa nga naghangos nga nagpahibalo sa pari. “Gitapukan sa daghang mga tawo.

“Ha?” sa pari pa nga gibati og hilabihang katingala ug nagdali sa pagpaingon sa altar nga gipahimutang sa maong imahen sa sulod sa simbahan.

“Dre,” sampit sa usa ka babaye nga misugat sa pari. “Kanang maong imahen mao ang bata nga didto sa amo nga isog kaayong mitikwang sa mga lamesa nga among gitapokan sa pagsugal.

“Tinuod na Dre,” mitimang ang laing babaye. “Ug kun duna kuno mi reklamo pasundon lang niya dinhi kay nia siya dinhi magpuyo.

“Wala makatingog si Padre Gally Leo. Miluhod kini atubangan sa imahen ug nagpasalamat nga gidungog ang iyang pag-ampo. (Katapusan)