Tsiks killer

Gula 29

Nakapahiyom si Vivian nga nakadungog sa mga garay ni Kuya Mar, ang kinaham niyang radio announcer, ug ilabi na dihang giingnan siya nga alang kadto kaniya ang maong mga balaknon nga pulong.

Ang pagbisita ni Vivian sa estasyon sa radyo atol gayud sa programa ni Mar maoy nakahatag og kadasig sa announcer. Kalit lang nga nagyapa-yapa sa kalipay ang kasing-kasing ni Mar.

Nakabantay niini ang iyang mga tigpaminaw. Usa niya ka caller nga si Mary Villacorta mitwag og mikomedya. “Ah, wala na man magsubo si Kuya Mar nga gibisitahan sa iyang maanyag nga bulak.”

Human sa programa ni Mar, nagkasabut sila nga mangadto sa IT Park aron magpalabay sa oras. Kay dili man sila makarga sa motor, mibuluntaryo si Virgilio nga si Vivian na lang ang moangkas sa motor ni Mar.

“Apas ra ko ninyo Kuya Mar,” giingnan ni Virgilio ang higala niyang radio announcer. Mipasirit si Mar sa iyang motor ug angkas niya si Vivian.

“Anad ka ba nga mosakay og motor Vian?” gisukna ni Mar ang dalaga aron pagputol sa kahilom tali kanila.

Gitug-anan si Mar ni Vivian nga dili bag-o alang kaniya ang pagsakay og motor. Dunay tindahan nga nagbutang og lamesa gawas sa maong balay-patigayon ug didto sila mihunong.

Mi-order si Mar og ilang mainom. Mango-shake ang iyang gi-order para ni Vivian ug mi-order si Mar og usa ka botelya nga beer.

Taud-taud, nakadawat og text message si Mar nga gikan ni Virgilio. “Kamo na lang diha Kuya Ren kay mora’g layo na man, basin makatugaw pa ko ninyo,” matud ni Mar.

Bisan og naanad na si Mar nga daghan siya og mga babaye nga gikarelasyon apan daw gidaug siya sa kaikog ni Vivian. Wala gani siya makadiga g’yud sa iyang gibati ngadto sa dalaga.

Miabot na lang ang higayon nga nakigpamauli na si Vivian. Gihatud ni Mar ang dalaga sa ilang balay. Kadto maoy nakapasuod kanilang duha.

Daghang mga buntag nga tawgon ra g’yud ni Mar si Vivian og pangutan-on kun naka-inom na ba kini og init nga coffee o nakakaon na ba. Gipabatyag ni Mar sa dalaga nga nagpakabana siya kaniya.

Hangtud nga usa ka buntag, nakalitan si Mar kay si Vivian na ang mitawag ni Mar ug maoy nangutana kun naka-coffee na ba ang radio announcer.

Wala na makapugong si Mar. Sa dayon nilang human og sultihanay, nakahigayon na gayud siya. “Wala ka ba makasabot sa kahulogan sa kanta nga kanunay kong ipahinungod kanimo Vian? Ang Just Tell Me You Love Me?”

Wala motingog si Vivian. Gibuak ni Mar ang kahilom pinaagi sa pag-ingon “I love you Vivian.” (Sumpayan)