Anino sa kulto

GULA 117

Miliko si Carlo paghiabot niya sa usa ka eskina. Apan nakita niya sa side mirror nga miliko usab ang awtong itom. Mibatig kapikal si Carlo nga naghunahuna nga nakasunod gihapon ang maong sakyanan kaniya.

Nahiabot na sila sa sentro sa lungsod sa pagginukdanay. Pag-abot ni Carlo sa laing eskina, miliko na usab siya. Diha gihapon sa luyo ang itom nga awto. Giyatakan niya’g kusog ang gasolinador ug mihimo siya’g pilit kaayong pagliko sa paghiabot niya sa laing eskina. Sa matag karon ug unya mobusina siya. Makadaghan siya mohimo’g pilit kaayong pagliko sa lainlaing mga eskina hangtod nga wala na niya makita ang awtong itom sa iyang luyo.

Nakaginhawa’g luag si Carlo. Nagtuo siya nga nalipat na niya ang mga kaaway. Wala na gayod kini niya makita nga nagsunod sa iyang luyo. Mipadayon siya pagpadagan sa iyang sakyanan.

Apan sa paghiabot niya sa dapit diin likuon ug diyotay ang karsada, nakalantaw siya’g duha ka motorsiklo nga naghunong sa masigka daplin sa dalan nga gisakyan sa duha usab ka tawo nga pulos nagmaskara. Sa iyang paghisaylo sa ilang nahimutangan, namatikdan niya nga misunod sila kaniya.

Nakasabot gilayon si Carlo nga kining mga tawhana kauban niadtong mga tawo nga nagsakay sa awtong itom. Nangandam na usab siya sa iyang kaugalingon. Gipakusgan niya ang iyang pagpadagan.

Girakrakan si Carlo sa duha ka tawo nga nagsakay og motorsiklo. Mibalos pagpabuto si Carlo sa walay tumong nga pagtira. Nisil-ip siya sa side mirror. Iyang namatikdan nga ang usa ka tawo kursonada gayod nga migukod kaniya. Tulin nga miagpas ang motorsiklo niini sa gimaneho niyang awto. Daw buot kining mo-overtake kaniya. Napikal si Carlo sa iyang nakita.

Dihay kalit misantop sa hunahuna ni Carlo. Dihadiha kalit niyang giyatakan ang preno sa awto. Misagitsit ang ligid niini nga ingon sa nanguma sa semento sa karsada. Kalit nga mihunong ang awto. -- Sumpayan pa