Tsiks killer

Gula 28

Daw nakasabot usab si Vivian nga may pagtan-aw kaniya ang radio announcer nga si Mar tungod sa gi-dedicate kaniya nga kanta – ang Just Tell Me You Love Me – apan igo lang siya nga mipahiyom.

Wala magdugay si Mar sa pagbisita niya’g balik ni Vivian human sa iyang programa sa radyo kay lapas na ang tungang gabii. Nasabtan ni Mar nga gaan kaayo’g buot kaniya ang dalaga.

Pag-uli ni Mar sa iyang gipuy-an, dugay siya nga nakatulog. Gihanduraw niya ang maanyag nga panagway ni Vivian, ang tam-is kaayo nga pahiyom sa dalaga ngadto kaniya.

Nangandoy si Mar nga mahimo unta niya nga hinigugma si Vivian kay gusto niya nga matupsan sa katam-is ang mga ngabil sa dalaga. Apo sa usa ka retired judge si Vivian ug mikuha og kurso pagka doktor.

Gikanunay na ni Mar ang pagpahinungod og kanta ni Vivian sa iyang matag gabii nga programa, sama sa gihapon Just Tell Me You Love Me ang iyang gi-dedicate sa maanyag nga medical student.

Gituyo ni Mar nga wala na mokontak ni Vivian bisan og nasayud siya sa numero sa telepono niini, apan dili gayud siya malimot pag-dedicate kaniya sa kinaham niyang awit.

Usa ka gabii, daw gilaay si Mar sa iyang programa. Wala siya’y bisita kay nahadlok tingali kay baga kaayo ang dag-um, mora’g kauwanon. Ingon sa masulob-on ang tingog ni Mar nga nagdumala sa programa.

Ang kasubo sa iyang tingog, giubanan usab sa makahuloganon kaayo nga music nga iyang gipatugtog. Sama sa Loving You, I Can’t Stop Loving You ug dayon ang awit nga Hey ni Julio Eglesias.

Ang unang lyrics sa maong awit “Hey, it’s wonderful to see you once again, see you smiling when you call my name.” Daw gusto na ni Mar nga makita niya pag-usab ang namingawan niya nga si Vivian.

Gipatugtog ni Mar ang mananoy kaayo nga huni nga Dolannes Melody ug gipaubanan niya sa sound effects sa mga bawod nga mapusgay sa lapyahan. Nakapasamot kini sa kamingaw nga gibati ni Mar.

Plano ni Mar nga mohimo siya’g pipila ka garay dungan sa huni nga daw maoy mohapin sa iyang tingog. Apan wala lang palandonga ni Mar nga kalit lang miabut si Virgilio, ang iyang suod nga higala, uban ni Vivian nga mapahiyumon. Kalit lang napiskay ang iyang kaugalingon.

Dungan sa sound effects sa mga hapak sa bawod ngadto sa lapyahan, sa bugnaw nga tingog migaray si Mar. “Ang mga bawod mahimong mahikalimot sa paghawok sa lapyahan sa baybayon, ang kalanggaman mahikalimot sa matam-ison nilang pag-awit, apan ako dili ug dili gayud mahikalimot kanimo.”

Mipahiyom si Vivian nga mitan-aw ni Mar. Alang kadto nimo Vian. (Sumpayan)