Anino sa kulto

Gula 116

Nangandam si Carlo sa iyang kaugalingon. Napaghilantawan niya ang posibleng mahitabo. Gilanit niya ang .45 kalibreng pistola gikan sa iyang hawakan ug hugot nga gigunitan sa iyang tuong kamot. Mikilas ang iyang mga mata.

Gipakusgan ni Carlo pagpadagan ang iyang gisakyan. Apan namatikdan niya nga nakasunod gihapon kaniya ang awtong itom. Misamot ang katahap ni Carlo nga siya gayod ang tuyo sa mga sakay niini. Karon gipiga niya ang iyang alimpatakan sa pagpangita’g paagi nga malutsan niya ang mga tawo nga nagsakay sa itom nga awto. Apan iyang nasuta nga wala na siya’y igong panahon sa paghunahuna’g paagi sa pagsulbad niining wala damha niyang suliran nga mahibagatan sa dalan.

Kalit milanog ang mga butobuto gikan sa mga armas nga tag-as og kalibre. Mikagay ang salamin sa luyong bahin sa awto ni Carlo. Nakahupo siya sa manibela sa awto kay ingon sa gihanginhanginan siya sa mga bala. Apan wala siya magpalipat sa iyang pagmaneho. Gipaikis-ikis niya ang pagdagan sa iyang sakyanan.

Gipakusgan pa gyud ni Carlo ang pagpadagan sa iyang awto. Daw giangkon sa sakyanan ang tibuok gilapdon sa karsada sa ikis-ikis niining pagdagan. Apan sa luyo wala magpagintang ang itom nga awto. Nahisama kini sa iko’g sa mananap nga nagsunodsunod sa awto ni Carlo. Ang mga sakay niini wala molunga sa pagpaulan og mga bala ngadto sa sekreta.

Dihang nakahigayon si Carlo, mibalos siya sa pagpabuto. Apan walay pihong tumong ang iyang pagpusil kay ang iyang mga mata didto ra man sa unahang karsada nga iyang gipadulngan.

Nagpadayon ang ginukdanay sa duha ka sakyanan. Sa matag karon ug unya mosibaw ang mga butobuto. Apan si Carlo wala gayod magpatental sa kalisang. Gipadayon niya ang pag-ikis-ikis sa dagan sa awto aron maglisod ang mga kaaway sa pagpunting kaniya. -- Sumpayan pa