Tsiks killer

Gula 26

Nianang adlawa didto sa estasyon sa radyo nga gitrabahoan ni Mar, gibisitahan siya ni Virgilio, ang suod niya’ng higala. Gipahibalo si Mar nga dunay suki g’yud niya nga tigpaminaw sa programa nga mag-birthday ug nangimbitar.

“Wala ka makaila niya Mar pero dugay na kaayo na siya nga tigpaminaw sa imong programa. Gisugo g’yud ko niya nga ipaimbitar ka,” pasabut ni Virgilio ngadto ni Mar.

Tuod man, kay layo pa man ang programa ni Mar, nag-angkas sila sa motor ug mipaingon sa balay ni Vivian, ang giingong nag-birthday ug tigpaminaw ni Mar.

“Kuyawan ko nga kun makakita ka ni Vivian Kuya Mar, basin maibog ka na usab,” ang gisulti ni Virgilio nasawod g’yud sa pagpaminaw ni Mar kay samtang nag-angkas si Virgilio ang ba-ba niini diha g’yud dapit sa dunggan ni Mar.

Igo ra nga mikatawa si Mar. Pag-abut nila sa ganghaan sa balay nga gitudlo ni Virgilio nga maoy ila ni Vivian, dunay lalaki nga diha sa may koral.

“Uy, si Rene Casipong man diay na. Tigpaminaw usab nimo na sa programa Mar,” matud ni Virgilio.

Gipislit ni Virgilio ang button sa door bell diha sa kilid sa gate. “Kaila ba sila si Vivian ug kini si Rene Casipong bay Vir?” pangutana ni Mar. “Dili, wala pa kami magkaila ni Vivian,” si Rene Casipong na ang mitubag.

“Buyno bay Vir, siya maoy ipaila nga si Kuya Mar ha, ug ako maoy Rene Casipong,” matud ni Mar. May nakita sila nga gwapa nga babaye nga migawas ug nagpahiyom.

“Dugay man lagi mo Vir?. Dali sulod mo,” matud sa gwapa. Nagngisi si Virgilio nga mipaila-ila sa iyang mga kauban.

“Vian, kini diay si Rene Casipong,” ni Virgilio pa nga mipikpik sa abaga ni Mar. “Ug kini usab si Kuya Mar,” matud ni Virgilio nga mipikpik usab sa abaga ni Rene Casipong.

Igo lang mipahiyom si Vivian. Giabi-abi ni Vivian ang iyang mga special nga bisita. “Nalipay kaayo ko nga nagkaila kita karon Vian. Happy birthday diay,” gipig-it ni Mar ang kamot ni Vivian.

Mitutok si Vivian kang Mar nga nagpaila kaniya nga Rene Casipong. Nagpahiyom lang si Virgilio. “Mata’y gikomedyahan g’yud ko ninyo da. Dili man g’yud ni si Rene Casipong ba, ikaw man g’yud si Kuya Mar,” matud ni Vivian nga mitutok sa nagpailang Rene Casipong.

“Siya si Kuya Mar ug ako si Rene Casipong,” pagtingog ni Mar, misamot nga nakapahiyom si Vivian. Mikatawa si Virgilio, “bisto ka na lagi Kuya Mar, ilhan lagi nang tingog nimo kay tigpaminaw gud na nimo si Vivian.”

Nagkinataw-anay na lang sila. Nabisto ang ilang pagpangalyas. (Sumpayan)