Hinog sa punoan

Apan daghan og reserbasyon si Urielle. Nahinugon siya sa gugma nila ni Nelson. Nagkahigugmaay sa tinud-anay sila si Nelson. Gani nagkasabot na man sila nga magminyo inig-abot sa tukmang panahon. Kun mosanong siya sa gustong mahitabo ni Don Emilio ug magpakasal siya ngadto kang Patrick, usa kini ka dakong trahedya sa gugma nila ni Nelson. Gawas pa, iya usab nga gihunahuna kun magmalipayon ba kaha siya kun makig-uban siya sa lalaki nga wala niya higugmaa.

Si Nelson ang iyang gihigugma, kini ang tag-iya sa iyang kasingkasing. Nakaseguro siya nga maglisod siya sa paghikalimot kang Nelson. Hinuon, iyang nasuta nga dili usab lisod higugmaon si Patrick. Gawas nga anak og adunahan, ambongan ug buotan pa gayod kini.

Apan si Nelson ang gipitik sa iyang kasingkasing. Si Nelson ang gusto niyang mabana. Bisan sa damgo lang, wala siya maghunahuna nga sila si Patrick ang pagakaslon. Wala siya mangandoy nga makabana og adunahan. Gusto siyang makabaton og kapikas sa kinabuhi nga susama ra usab nila og kahimtang.

Apan ingon sa malukmay usab dayon ang iyang kasingkasing kun maghunahuna siya sa iyang mga ginikanan. Nakasud-ong siya sa kapait sa ilang kahimtang. Nasayod siya nga kun pakaslan niya si Patrick, seguradong mausab gayod ang dagan sa ilang kinabuhi. Ug kadtong nautang nilang dakong kantidad gumikan sa pagkasakit ni Nang Mariciana, isipon na kadto ni Don Emilio Arcanghel nga impas na tanan basta magpakasal siya kang Patrick. -- Sumpayan pa