Hinog sa punoan

Gula 29

“Sabta usab kami si Nanay, mo,” nagkanayon si Noy Sidro. “Mga tigulang na kami. Bisan sa tibuok namong kinabuhi, dili tingali kami makabayad sa kantidad nga atong nautang kang Don Emilio. Apan maimpas kadtong tanan kun mosugot ka sa pagpakasal kang sir Patrick.”

Nahiunlod na usab si Urielle sa halawom nga pagpamalandong. Nahanduraw niya ang kahimtang sa iyang mga ginikanan. Sa kadako sa ilang nautang ngadto kang Don Emilio Arcanghel gumikan sa pagkasakit sa iyang inahan, seguradong maglisod gayod sila pagbayad sa dakong kantidad nga ilang nautang.

Naluoy siya sa iyang mga ginikanan. Apan iyang nahanduraw ang iyang kaugalingon nga maoy mas makaluluoy. Siya karon ang magsakripisyo. Kun mosanong siya sa gustong mahitabo ni Don Emilio, nagkahulogan kini og dakong sakripisyo sa gugma nila ni Nelson. Nagkahulogan kini’g kapakyasan sa ilang saad ug kasabotan. Kapakyasan sa ilang gugma.

“Dili pa hinuon pinal ang kasabotan namo ni Don Emilio, Urielle,” matud ni Noy Sidro. “Gitahod niya ang mamahimo mong hukom. Kun mobalibad ka, dili niya ipamugos ang iyang anak nganha kanimo. Dili ka sab niya pugson. Apan ang imong pagbalibad nagkahulogan usab nga atong pagabayran ang atong nautang kaniya nga dako kaayong kantidad. Busa, hunahunaa pag-ayo, Urielle, kun hain ang imong palabihon. Ang gugma ba ninyo ni Nelson? O ang gitanyag ni Don Emilio?” -- Sumpayan pa