Milagroso nga patron

Samtang nag-hike si Atty. Rel Bacalas ning sayong kabuntagon (kay nabatasan na niyang kada adlaw mag-hike), nakadungog siya’g sipa nga buto sa pistola. Unya natumba siya daplin sa karsada sa baryo Ingapirca, ning dakbayan.Ug nakita niya nga nababha iyang tuong bagtak. Daghang dugo ang nangagas gikan sa iyang samad. "Pangadye nalang daan attorney.

Kay tiwasan na tika!" isog nga pulong ni Ritche Tibon nga nagtion sa pistola tumong sa ulo ni Rel. Gisundan diay ni Ritche si Rel nganhi sa awaaw nga lugar iyang laktanan. "Unsa may sala nako?" ni Rel nga nagpugong ang duha ka kamot sa iyang samarong tiil samtang nagyaka. "Imong gisurambaw ang kaso ni Mama Lina! Napildi hinoon siya!" ni Ritche nga pinasingka. "Sukad masukad sa akong pagpanglaban, sobra na bayente anyos, wa gyud koy kasong gisurambaw" malumong pulong ni Rel. Niping-it sa kahapdos sa iyang samad.

Si Lina Tibon iyang kliyente. Dunay yuta sa iyang amahan nga namaniobra ang papeles. Natitulohan sa ngalan sa laing tawo. Naabtan og sobra 30 anyos nga wala sila nipasaka og kaso. Bag-o lang nanginteres. Unya contingent ang gikondisyon sa abogado.

"Kini rang kaso namo diay, ang imong gisurambaw!" ni Ritche. Siga kaayog mga mata. "Dili ka kaingon ana, Ritche. Bisag nagdahom tang modaug sa kaso, dili nato matag-an ang pangisip sa huwes. Panamini lang ang kaso sa mga Vizconde. Nidaug sa RTC. Nidaug sa Court of Appeals. Unya napildi sa Supreme Court. Ayaw ko butangbutangi’g sala. Nag-apas sab god kong makayuta. Tunga’s hektarya goy gisaad ni mama nimo. Wa ko kakwarta sa inyong kaso" ni Rel. "Didto ka’s pikas kakuwarta. Busa, pangadye na" ni Ritche. Lisod ang kahimtang ni Rel. 54 pa iyang edad. Di pa unta siya gustong mamatay. Apan wa siya’y mahimo kun oras na gyud niya.

"Ginoo, kun itugot nimo nga ingon ini ang akong kamatayon, dawaton nako. Dalaygon ang Diyos labaw sa tanan," tuaw ni Rel sa hilom. Iyang kapikas nga si Glenda, inig kabiyuda maatiman ra’s iyang duha ka anak lalaki nga puro na propesyonal. Minyo na ang kamaguwangan. May duha na ka anak. Kontento na si Rel nga nakakita na sa iyang mga apo. Apan duna pa unta siya’y gustong buhaton. Mosalmot siya sa Huninyo Song Writing Contest sa Basilica.

"Ritche, puwede ko mohangyo og katapusang hangyo? Sa Bilibid, ang bitayonon, hatagan man sa katapusang pangayo" ni Rel. "Unsa man?" ni Ritche. "Ako unang kantahon akong komposisyon alang ni Sr. Santo Niño. Inig human nako’g kanta una pa ko pusila. Apan kun di ka kauyon sa awit, ay na lang ko’g patiwasag kanta" ni Rel. "O sige sige. Kanta na! Kanta na!" ni Ritche nga naghandoshandos sa pistola ngadto sa tangkugo ni Rel. Naningkamot nga makaluhod bisag nagkalisod. Nitalikod ni Ritche. Niatubang sa mga halaman daplin sa karsada. Niisa sa iyang duha ka kamot nga morag nangadye og Amahan Namo. Ug niawit "MILAGROSO NGA PATRON/NING SUGBOANONG BAYBAYON / IWAG SA DALANG MANGITNGIT / MAY GUGMANG LABING HINGPIT / ANGAY GYUD SIYANG MAHALON / ANG MILAGROSO NGA PATRON / NABULAHAN ANG SUGBO / PAGSANGPIT SA NGALAN MO OH SENIOR SANTO NIÑO / BALAAN ANG PAGHIGUGMA MO GAMHANAN ANG MGA PULONG MO / OH DIYOS KO / IKAW ANG BUGTONG GABAYAN / PADULONG SA KALUWASAN / GUGMA MO ANG LIG-ONG DANGPANAN / SA TANAN SENIOR SANTO NIÑO / GIAMPO KO ANG KAPISKAY SA TANAN / KALINAW UG KALIPAY SA KALIBUTAN / SENIOR SANTO NIÑO / PIT SENIOR / SENIOR SANTO NIÑO SANTO NIÑO / PIT SENIOR" Ginindot niya pagkanta.

Pagkahuman og awit, nipiyong nalang si Rel. Nagpaabot sa buot. Nanakit na iyang mga tuhod paglinuhod kay nidulot niini ang gagmay'ng mga bato. Nitang-on ang dugo sa iyang samad. Way buto. Nilingi siya’s iyang luyo. Nahanaw si Ritche. "Salamat Santo Niño nga gilamdagan nimo ang pangisip ni Ritche" ni Rel. Nibalik og yaka. Ug nikuot sa iyang selpon. Gipindot. "Ipakuha ko’g sakyanan. Ipasubay lang akong rota. Di na ko kalakaw kay naigo ko’g stray bullet" ni Rel. Gipasaylo niya si Ritche. Wa siya’y laraw mokiha niya. (Kataposan) (Sa magbabasa,aron makalibre’g konsulta, dad-a ning pahina sa opisina sa tagsulat sa Sabado)