Hinog sa punoan

Gula 27

“Wala baya mamugos si Don Emilio, Urielle,” matud ni Noy Sidro. “Matud niya nga tahuron niya ang bisan unsa nga mamahimo mong desisyon.”

Naghinuktok si Urielle sa atubangan ni Noy Sidro.

“Sa akong pagsabot “gikan na usab ni Noy Sidro. “Maayo man ang tumong ni Don Emilio. Apan kining tanan anaa ra gyud kanimo, sa imong paghukom. Di sab ko mopugos nimo pagdawat sa tanyag ni Don Emilio. Hatagan ko ikaw og higayon pagtimbang-timbang ning tanan.”

“Daghang salamat, Tay. Ang tinuod, lisod gayod alang nako ang paghukom ning butanga. Nakalitan ko.”

“Nasayod ko anak. Bisan ako pa ang nahimutang sa imong dapit dili sab sayon para nako ang paghukom. Apan hunahunaa sab ang dako kaayo natong utang sa pamilyang Arcanghel.

Nahatalunong si Urielle. Unya nitidlom ang iyang hunahuna sa lawom nga pamalandong.

“Nakagusto si Don Emilio kanimo, Anak. Gusto siya nga ikaw ang mapangasawa sa iyang anak.”

“Pero, Tay, nasayod ka nga dili kana mahimo. May hinigugma na ko ug nasayod ka niana. May hinigugma na usab si sir Patrick.”

“Gipakigsultihan na ni Don Emilio si sir Patrick. Sa sinugdan, nagdumili ang iyang anak. Apan sa kapulihay, nakasabot ra kini sa iyang tumong ug misanong kini.” -- Sumpayan pa