Hinog sa punoan

Gula 26

“M-maayong kahigayonan? U-unsay buot mong ipasabot, Tay?”

Mitug-an si Don Emilio kanako nga hilom diay siyang nakagusto nimo alang sa iyang anak.”

“U-unsa?”

“Mao kana, Urielle. Ug gusto siya nga ipaasawa ka ni Sir Patrick.”

“T-tay...?”

“Miingon si Don Emilio nga kun mosugot ka ug makigminyo kang Sir Patrick, isipon na niyang naimpas ang atong nautang kaniya.”

“Ingon ba diay niini ang gusto niyang mahimong bayad sa atong nautang niya, Tay?”

“Dili ingon niana ang tumong ni Don Emilio, Urielle. Gusto lang siyang makatabang nato.”

“Kun gusto siyang motabang, nganong ingon man niini ang bugti? Kinasingkasing man kaha ang iyang pagtabang?”

“Kinasingkasing ang pagtabang ni Don Emilio kanato, Urielle. Suma’a gud. Gipakyas ba kita niya bisan unsay atong gihangyo niadtong panahon nga nagkasakit ang imong inahan? Nagpautang siya kanato og dakong kantidad sa wa’y daghang kuti-kuti. Moduaw pa gani siya sa tambalanan aron personal nga magsusi sa kahimtang sa imong inahan.”

Wala motingog si Urielle. Gihinuktokan niya ang gisulti sa iyang amahan. Iyang natugkad nga husto si Tatay Sidro niya. Maayo kaayo si Don Emilio Arcanghel kanila. Kun tukion pag-ayo, dako na kaayo ang ilang utang kabubut-on ngadto niini, labaw pa sa kadako sa kantidad sa salapi nga ilang nautang. -- Sumpayan pa