Lodging house

Lodging house

SAKRISTAN: Dre ... dako man kaayo ning kombento wala man gyuy nagpuyo dinhi.

PARI: Nakahunahuna bitaw ko sakristan nga himoon ko ning lodging house.

SAKRISTAN: Butangi.

* * *

Medicine

GOLIAT: Noy Teban taasa sa akong hilanat oy.

TEBAN: Katawa lang Goliat ... maayo ra lagi ka.

GOLIAT: Unsay katawa.

TEBAN: Kay giingon man nga laughter is the best medicine.

GOLIAT: Patay.

MOONLIGHT ROMANCE

Ni Rosalie V.

Hinog sa punoan

Gula 25

Usa ka adlaw niana, gipatawag ang amahan ni Urielle ni Don Emilio Arcanghel. Wala magmakuli si Noy Sidro sa pagsanong sa pagpatawag sa agalon. Nagtuo kini nga mahinungdanon ang tuyo ni Don Emilio maong miadto siya sa balay niini nga nahimutang sa kinapusoran sa lungsod sa Tuburan.

Apan mao na lamang ang kahibulong ni Urielle dihang nahiuli ang iyang amahan sa ilang pinuy-anan nga naglamugdong sa kasubo ang hitsura. Wala dayon kini makatubag dihang iyang gipangutana kun nganong gipatawag kini ni Don Emilio Arcanghel.

Mibatig kahibulong ug kabalaka si Urielle. Unsa man kaha diay ang hinungdan sa pagpatawag ni Don Emilio Arcanghel sa iyang amahan nga ingon sa subo man kining nahiuli? Unsa man kaha diay ang tuyo ni Don Emilio kang Noy Sidro? Kining maong mga pangutana gisukot ni Urielle sa iyang kaugalingon.

“U-unsa man diay resulta sa imong lakaw, Tay?” Misukit si Urielle.

“Urielle, Anak,” ni Noy Sidro pa. “Hinaot nga makasabot ka.”

“B-bahin sa unsa, Tay?” Mikunot ang iyang agtang.

Wala motubag si Noy Sidro. Nanghupaw hinuon kini uban ang pagpanglingo. Natugkad ni Urielle nga ingon sa maglisod ang iyang amahan pagpadayag sa buot niining isulti kaniya.

“Kay unsa man diay hinungdan nga gipatawag ka man ni Don Emilio Tay?” Laing pangutana ang gipasupot ni Urielle. “Naningil na ba siya sa atong nautang kaniya?”

“Wa siya maningil, Urielle,” tubag sa amahan. “Hinuon may gitanyag siyang maayong kahigayonan alang kanato.” -- Sumpayan pa