Gigitik sa Santo Niño

Sukad nabuto nga konsehal sa barangay Wiracocha, si Glen Tibon, wa siya’y tambongtambong og session sa konseho. Ang nakaparat kay maoy number one nga councilor siya. Daghang mga higala ug mga silingan niya nga nakaingon nga nalisoan siya sa pangisip. Gani, iyang mga ginikanan ug mga igsoon naulaw unta nga mamatikdan ang lihok ni Glen. Apan makita sa kadaghanan.

Kay hapit sa tanang higayon, mabuntag ug hapon magligidligid man siya sa pantawan sa ilang balay sa Sitio Virola. Karong buntaga, Sabado. Unya nia na sab siya sa ilang pantawan. Nagtukiki’g katawa nga nagligidligid sa sawog. Nakigduwa og batang di makita.

Kamaguwangang anak si Glen. Sayong niapil sa bisyo sa drugas. Hayskul pa lang siya sa kadaghan na madala sa mental hospital kay mag-wild kun masabog. Na-rehab siya balig unom ka bulan. Unya nabag-o iyang panglihoklihok. Nabut-an siya. Nahimong aktibo sa kalihokan sa komunidad. Kay niya pa, gimilagrohan siya ni Santo Niño. "Nakigsulti nako ang balaang bata. Iya kong gibadlong nga magtinarong na" pasabot niya sa nakuryoso sa iyang pagbag-o.

Nihangyo siya’s iyang ginikanan nga mobalik og eskuyla. Kay gusto na siyang makahuman og kurso sa kolehiyo. Tuod man, nakahuman siya sa hayskul. Unya nakahuman sab og kurso sa kolehiyo nga "Public Corporation" mahitungod sa mga kalihokan sa gobyerno. Nagdeboto siya sa Santo Niño. Matag Biyernes mosimba siya sa Basilica. Unya namalit siya’g imahe sa balaang bata. Gipabinditahan niya. Gipamutang tagsatagsa sa tanang lawak sa ila.

Nahadlok ang pamilya ni Glen nga naliso na iyang pangisip. Kay makighinabi na siya sa imahe sa Santo Niño. Madungog nila ang tingog ni Glen sa iyang lawak, nga magkatawa, maghagwa og magkomedya sa usa ka bata. Daw duna gyud siya’y kahinabi sa iyang lawak. Bisag siya rang usa. Unya kugoskugoson niya ang imahe ug dad-on bisag asa siya suroy. Kun naa siya sa pantawan sa ila, mokalit lang siya’g ligid sa sawog kay gigitik kuno ni Santo Niño.

Kun duna siya’y lakaw o gimbuhaton, mananghid siya sa imahe. Unya ipangutana niya kun malampuson ba iyang lakaw. Wa gyud siya pakyasa sa Santo Niño. Apan kulang gihapon sa pagtoo iyang pamilya, mga higala ug mga silingan nga naa ang Santo Niño sa iyang kiliran. "Ako nang nahimong abyan ang Santo Niño" ni Glen nga mapahiyomon sa higayon nga pangutan-on siya kun nganong daladalahon niya ang imahe sa balaang bata.

Sa ilang victory party pagdaug nilang mga konsehal ug kauban sa linya nga barangay captain, hapit kulataha si Glen sa mga bisita. Kay gipangyabo niya ang mga inablihang botelya sa tanang ilimnong makahubog sama sa rum, gin, brandy, whisky ug beer. "Kontra sa akong abyan ang ilimnong makahubog. Gidili niya kini. Labi na sa mga nagserbisyo sa gobyerno" pasabot ni Glen. Nagpangumo ang mga opisyales sa barangay nga gusto’g ilimnon. Hasta ang mga dinapit. Apan may pipila nga nagrespeto ni Glen kay siya goy may kinadaghana’g boto.

"Uy! Glen! Balhin didto sa sulod sa imong lawak. Adto pakighagwa sa imong kaduwa sulod sa imong lawak. Aron way mahibulong nimo!' ni Lino iyang amahan nga magtutudlo sa saring publiko. "Di man ganahan sa akong lawak ang senyor. Kay alimoot" ni Glen nga daw bata.

"Konsehal Glen. Konsehal Glen. Mangayo unta ko’g hinabang. Kay grabe akong anak. Gi-dengue. Wa koy kuwarta ikapaospital, bayad sa tambal ug doctor" tingog sa usa ka babaye nga nihawong sa hagdan sa balay nila ni Glen. Nagkugos og bata nga giputos og lampin. "Ha?" napatiurok si Glen."Senior Santo Niño, unsa may akong ikatabang sa bata nga gi-dengue?" ni Glen nga naggakos sa imahe sa batang balaan sa sawog."Dayon una misis. Lingkod. Kay tambalan ni Senior Santo Niño imong bata" ni Glen. Nisaka ang babaye dala ang batang gikugos.

Nibarog si Glen. Gipukas niya ang lampin nga putos sa bata. Mga tres anyos ang batang lalaki. Nikuray sa hilanat. Ug may mga libagha sa panit. Lukop iyang lawas. Gipasayaw ni Glen ang imahe sa tibook lawas sa bata. Gikan sa hubon, agtang, nawong, liog, dughan, mga bukton, tiyan, mga paa, mga batiis, bukobuko. Niubos ang hilanat sa bata. Ug nangayog totoy.

Dangtag tulo ka tuig, barangay kapitan na si Glen. Unya daghan nang maglinya sa ilaha nga magpayatak sa imahe sa Santo Niño. Tanan mangaayo sa ilang sakit. (Katapusan)