Tsiks killer

Igo lang mipahiyom si Mar dihang giingnan ni Glo nga tsiks boy g’yud ang mga radio announcer.

Mora siya og natuk-an pagkadungog sa maong pulong kay dili niya ikalimod nga tsiks boy g’yud kaayo siya ug daghan nang mga babaye ang nakatilaw sa iyang pagka tsiks boy, usa na kanila si Glo.

“Kuya Mar, ayaw ipanabi ang nahitabo nato ha? Dili ko gusto nga mahibaw-an unya sa akong pamanhonon kay kasal na ra ba namo karong Abril,” matud ni Glo.

Hilom nga gikahinangop ni Mar ang iyang nadungog kang Glo. Nagpasabot kini nga baliwala ra ni Glo ang nahitabo kanila karon sa motel sa Talisay kay gikatakda na man diay ang ilang kasal ug sa iyang hinigugma. Nag-ilis sila aron mamiya na sa hotel. “Glo, kun wala pa gani ang inyong kasal ug sa imong pamanhonon, mahimo ba nga mag-usab ta sa paglipay-lipay?” nagpahiyom si Mar nga misukna sa iyang tigpaminaw. “Unya na lang ko motubag ana Kuya kun manghagad ka og laing deyt,” ni Glo nga migunit sa kamot sa kinaham niyang radio announcer.

Mipasirit si Mar sa iyang motorsiklo human ikatunol ang P500 ngadto sa room boy. Gibilin na lang niya ang sukli kay P320 ra man ang ilang bayranan sa motel. Kay Domingo lagi, nakahukom si Glo nga modiritso na lang sila sa estasyon sa radyo nga gialagaran ni Mar. Sagad g’yud nga matag Domingo daghang tigpaminaw ni Mar ang mamisita kaniya sa estasyon. Dihang misulod na sila si Mar sa ganghaan sa compound nga nahimutangan sa estasyon, nakita ni Mar ang suod niyang higala nga si Virgilio. Nagpahiyom kini nga nagtan-aw kanila ni Glo. Wala malilong ni Virgilio nga gikan sila si Mar ug Glo sa ilang Leny sa Argao. Misulod dayon si Glo sa estasyon diin didto ang daghang mga tigpaminaw ni Mar nagpaabot kaniya.

“Buanga nimo Mar, dugay ka man kaayo miabut. Ganina ra na nga nagpaabot nimo sila si Zeny ug Claire. Ako na lang gani nga gilingaw-lingaw aron dili mopauli,” matud ni Virgilio ngadto sa higala. “Mao ba Bay?” matud ni Mar. May nahuna-hunaan siya nga paagi. “Sigi balik na ngadto ug abi-abiha usa sila. Mosunod ra ko, ari ko agi sa pikas.” Aron dili mahibaw-an ang iyang sekreto ngadto sa duha ka laing hinigugma ni Mar, didto si Mar miagi sa luyo. Dayon gituyo g’yud niya pagbuling-buling ang mga kamot ug mga abug.

Dayon, miadto si Mar sa nahimutangan sa iyang mga nagpaabut nga tigpaminaw.

“Sus Kuya, naa ka ra man diay. Ganina ra g’yud mi nga naghuwat,” halos magkadungan pagsulti ang iyang mga tigpaminaw. “Didto ko sa library kay nangutingkay ko og mga nindot nga music para sa programa nato sa Lunes,” pangatarungan ni Mar dungan sa pagpakita sa iyang kamot nga nabulit sa abug. (Sumpayan pa)