Hinog sa punoan

Gula 23

Pero karon nga nagkasakit ang ilang inahan, may hulga nga dili makapadayon pag-eskuyla si Raymond.

“Posibleng makapalta gayod una sa pag-eskuyla si Raymond, Urielle,” nagkanayon si Noy Sidro human sa taudtaod nga paghinuktok. “Wala na kita’y ikagasto pa kaniya. Nalukop na gani sa utang ang akong mga balhibo.”

Wala na lang motingog si Urielle sa iyang nadungog gikan sa iyang amahan. Alang kaniya, wala nay laing kapilian gawas sa paghunong una ni Raymond sa pagtuon. Ang desisyon sa iyang amahan maoy labing maayo nga ikapakanaog niining higayona taliwala sa ilang kapit-os.

Paglabay sa kapin sa usa ka bulan, gitugotan na si Nang Marciana sa mga doktor nga makagawas sa ospital. Inanay nang mibaskog ang inahan ni Urielle, butang nga gikalipay pag-ayo sa dalaga. Apan gitugon sila sa doktor nga kinahanglang ipa-ilawom gayod sa rehabilitation si Nang Marciana labing menos kausa sa usa ka semana aron hingpit nga mahibalik ang kabaskog niini.

Gipauli na nila ni Urielle si Nang Marciana ngadto sa ilang pinuy-anan sa Tuburan. Apan matag semana, moadto gayod sila sa dakbayan sa Sugbo alang sa pagpa-rehab niini. Sanglit wala’y laing kadangpan, kang Don Emilio gayod mosangko sa pagdangop si Noy Sidro alang sa galastohan sa pagpa-rehab kang Nang Marciana. -- (Sumpayan pa)