Anino sa Kulto

Wala nay lain, nakahukom si Carlo sa hilom. Siya na gayod kadtong nanawag kaniya. Ang supremo sa kulto maoy nagsakay sa motorsiklo nga wala lang niya mamatikdi nga hilom nga nagsunodsunod kaniya.

Nakapamalandong si Carlo sa maong daklit nga hitabo. Nahunahuna niya nga kun ang supremo sa kulto gayod kadtong nanawag kaniya, ingon sa inanay na kining nagpaila kaniya. Hilom niyang gikahimuot ang bahad niini. Gusto siyang mag-abot sa labing daling panahon ang ilang mga dalan aron matapos na ang tanan. Karon pa lang, naghinamhinam na siyang naghanduraw sa panahon nga magkaatubang na sila.

Gipaandar ni Carlo ang makina sa sakyanan. Inanay nga miaginod ang awto subay sa sementong karsada. Hangtod nga mikusog na ang pagdagan niini dihang giyatakan og maayo ni Carlo ang gasolinador. Samtang nagmaneho, ang sekreta motan-aw sa side mirror sa sakyanan matag karon ug unya aron pagsuta kun wala bay sakyanan nga nagsunod kaniya.

Milahos na si Carlo sa iyang gipuy-an.

Buntag sa adlaw’ng Huwebes. Naligo siya. Unya namahaw. Human makakaon, nag-ilis dayon siya. Moadto siya karon sa sementeryo. Duawon niya ang mga lubong sa iyang mga ginikanan. Dugaydugay na siyang wala makaduaw sa ilang lubong tungod kay libang siya sa daghang buluhaton.

Paggawas ni Carlo sa iyang kuwarto, maoy iyang natukmaan ang telepono sa sala nga nagsige’g kuriring. Gidulong niya ang nahimutangan sa telepono ug gipunit ang awditibo. Gipaod niya kini sa iyang tuong dalunggan. Nasuta niya nga si Maj. Dick Campo ang nanawag. “May mahinungdanon kong itaho nimo,” matud sa hepe. “Unsa kana, Dick?” nagpanikad siyang masayod. “Bag-o pa lang gyud kong nakadawat og report,” sa hepe pa. “May batang babaye nga gikidnap kagabii.” “U-unsa?”

“Mao kana, Carlo. Ang mga ginikanan sa bata sayong nanawag sa buhatan. Si Lt. Valera ang nakatubag. Siya’y mitaho kanako sa hitabo. Tulo kuno ka tawo ang nagdagit sa bata, pulos armado ug pulos nagtaptap sa ilang mga nawong.” -- Sumpayan pa