Hinog sa punoan

Nagtungha si Raymond sa kolehiyo sa dakbayan sa Sugbo. Kun makapadayon kini pagtungha sa sunod nga tingbukas sa klase, anaa na kini sa ikatulong ang-ang sa kursong edukasyon nga maoy gikuha niini.

Si Urielle unta ang angay nga motungha pag-una sa kolehiyo. Apan human sa iyang paggradwar sa hayiskol, wala siya makapadayon sa kolehiyo gumikan sa kawad-on sa iyang mga ginikanan. Paglabay sa usa ka tuig ingon sa miluag-luag og diyotay ang ilang kahimtang gumikan sa maayong abot sa ilang umahan. Mao nga gihagad siya sa iyang mga ginikanan nga moeskuyla sa kolehiyo bisan og duha ka tuig ra nga kurso basta lang aduna siya’y mahuman.

Apan ingon sa nawad-an sa gana sa pag-eskuyla si Urielle. Ingon sa nakagamot na kang Urielle ang gugma sa mga buluhaton sa balay ug pagtabang sa iyang mga ginikanan mao nga nawagtang ang iyang kaikag sa pagpadayon pag-eskuyla sa kolehiyo.

Si Raymond nga maoy lab-as nga gradwado sa hayiskol niadtong higayona maoy mipadayon pag-eskuyla sa kolehiyo. Misantop sab sa hunahuna ni Urielle nga mas importante nga si Raymond maoy unang makatapos og kurso kay kaniya ilabi na nga usa kini ka lalaki. Kun maminyo na kini, ang iya man gayong manghod maoy maningkamot pagbuhi sa pamilya niini. Lahi kaniya nga babaye nga mag-abag-abag lang unya sa panginabuhi sa iyang bana. -- Sumpayan pa