Hinog sa punoan

“Unsaon man kaha nato pagbayad ang atong nautang niya, Tay?” Mahingawaong nangutana si Urielle. Gawas sa P180,000 nga gigasto sa operasyon ni Nanay, nadugangan pa gayod kini gumikan sa lain pang mga galastohan dinhi sa ospital.” “Dili pa gusto si Don Emilio nga maghisgot kami niana karon,” matud ni Noy Sidro. “Unya na kuno kami maghisgot bahin sa atong nautang kun mamaayo na sa hingpit si Marciana.”

“Unsa man kaha diay iyang plano, Tay aron kita makabayad sa atong nautang niya nga mikabat na sa kapin P200,000?”

“Ambot lang, Anak. Pero nagtuo ko nga dili kita lisod-lisoron ni Don Emilio.”

“Sagdi lang, Tay. Kun mamaayo na unya sa hingpit si Nanay, manarbaho ko aron makatabang ko nimo pagbayad sa atong utang kang Don Emilio.”

“Ayaw na hatagi’g problema ang imong kaugalingon mahitungod niana. Makakita ra gihapon kita’g paagi nga masulbad kining problema nga atong nahiagoman karon.”

Nahilom si Urielle. Wala siya motubay sa gisulti sa iyang amahan. Apan dihay kalit misantop sa iyang hunahuna. Si Raymond ang iyang manghod.

“Unsaon na man lang ang pagtuon ni Raymond, Tay?” Nakasukot si Urielle. “Hapit na ra ba sab ang ting-enroll alang sa first semester.”

Wala dayon makatingog si Noy Sidro. Miduko kini sa atubangan ni Urielle nga ingon sa naglibog pag-ayo kun unsay angay buhaton. - Sumpayan pa