Tsiks killer

Gula 14

“Ayay, mora’g nagduda na g’yud ko ninyong duha da,” giingnan ni Leny sila si Mar ug Glo.

“Unsay imong gidudahan Len?,” pangutana ni Mar samtang padayon siya nga naggakus ni Glo. Nagngisi si Leny nga mipasabot nga nagduda na siya nga may relasyon sila si Mar ug Glo.

Milabay ang mga gutlo, pareho sila nga nakatagpilaw. Gipukaw na lang sila sa mga ginikanan ni Leny kay mangaon na. Human sa ilang pagpangaon, giagni ni Leny sila si Glo ug Mar nga mangaon og botong sa ilang kalubihan sa unahan.

Miuban ang ig-agaw nga lalaki ni Leny nga maoy mikatkat sa lubi. Nadani sila si Mar ug Glo sa kaanindot sa talan-awon sa atbang nga bungtod. Lapyo kaayo ang dahon sa kakahoyan ug nindot tan-awon ilabi na kadtong mga dahon nga may pagka-orange ang kolor.

“Kinsa’y nagpuyo anang payag sa unahan Len?,” nangutana si Mar kay nakita niya ang payag nga dili layo sa ilang nahimutangan. “Walay nagpuyo ana Kuya, amo kanang pahuwayanan kun moari mi sa uma,” dali nga tubag ni Leny.

Human sa ilang pagpangaon og botong, mipaingon sila sa payag. “Uy, nindot man diay kaayo dinhi Len. Pwede ba’g mamahuway usa ta dinhi?,” gikihatan ni Mar si          Leny.

Nakasabut usab dayon si Leny nga gusto si Mar nga mamahuway silang duha si Glo sa payag. “Sige Kuya, pamahuway usa mo diha. Biyaan ko usa kamo kay mobalik ko sa balay aron magkuha og pagkaon para nato,” dayong biya ni Leny.

Daw misayaw ang kasing-kasing ni Mar kay makalugar na g’yud siya karon og romansa ni Glo, ang usa sa maanyag niyang tigpaminaw sa programa sa radyo.

Gitutokan niya si Glo nga naghigda, dayon gihinay niya’g paduol ang iyang mga ngabil sa ngabil sa dalaga. Taud-taud, nag-ukobay na ang ilang mga ngabil sa pinadulot nga hinagkanay.

“May makakita gani nato dinhi Kuya Mar,” mabalak-on ang tuno sa tingog ni Glo. Abtik nga gisirad-an ni Mar ang pultahan. Gitukoran niya kini og kawayan aron dili maabli gikan sa gawas.

Unya, gipadayon ni Mar ang pagromansa ni Glo. Ning higayuna daw wala nay pugong-pugong si Glo nga misukol sa pakig-ukobay sa ngabil sa kinaham niyang radio announcer.

Dali ra kaayo silang nanginit. Nagpanghiram na ang mga kamot ni Mar sa tibuok kalawasan ni Glo. Nakapanglad-ok sa laway si Mar dihang nahikap niya ang igwad kaayong sampot sa dalaga. (Sumpayan)