Anino sa kulto

Gula 101

Sagdi lang, niya pa sa hilom. Gialam-alaman niya ang iyang kaugalingon kay nabatyagan niya nga misamot na hinuon ang gibati niyang kamingaw sa iyang hinigugma human sila nagkasulti sulod sa hamubo kaayong higayon. Naumol sa iyang alimpatakan ang usa ka laraw. Kun masulbad na niya ang kaso nga gisangon kaniya ang kasulbaran, pakigkitaan gilayon niya si Lexie. Ang maong laraw nahimong pabilo sa iyang kadasig pagpaningkamot nga masulbad pagdali ang krimen nga nahitabo sa lungsod sa Mabini.

Paandaron na unta ni Carlo ang makina sa iyang awto sa dihang mi-vibrate pag-usab ang iyang cellphone. Nagbagting kini. Nagtuo siya nga si Lexie ang mibalik pagtawag. Apan dihang iyang gitamdan ang caller ID, iyang nasuta nga ang nanawag dili mao ang iyang hinigugma. Dili niya sinati ang mga numero nga milutaw sa screen sa caller ID. Wala kini marehistro sa phonebook sa iyang cellphone.

“Hello?” Matud ni Carlo nga naminaw pag-ayo aron matataw kun motubag na ang nanawag kaniya. “Kinsa ni?”

Apan walay mitubag.

“Hello?” miusab si Carlo.

Ang nabati ni Carlo mao ang katawa nga gipanag-iya sa usa ka babaye. Katawa sa kantalita! Katawa nga ingon sa mahulgaon. Katawa nga daw nagpasidaan og kamatayon!

Mitingkag ang mga dalunggan ni Carlo nga naminaw sa katawa sa babaye nga ingon sa gipanag-iya na ang kalag ni Satanas. Namangon ang mga balhibo sa iyang mga bukton. Namugnaw ang iyang tingkoy. Ngil-ad kaayong pamation ang katawa nga iyang nadungog.

“Kumosta ka, Carlo Guieb?” nagkanayon ang babaye didto sa pikas linya. Pinahimutang ang sinultihan niini, hinay ang pamunto.

“K-kinsa ka?” nakapangutana si Carlo nga wala’y ideya kun kinsa ang babaye nga nanawag kaniya. “Unsay imong tuyo nako?” -- Sumpayan pa