Nangopya si Padre Efren

Dili ko ikaulaw sa pagsulti kaninyo nga ako nangopya! Kay sukad sa atong pagkabata, nakat-on ta sa pagsulti ug pagsulat pinaagi sa pagkopya sa atong nakita ug nadungog. Mangopya sab ta sa atong magtutudlo sa eskuylahan matud ni Father Efren Larrobis sa iyang pagsugod og wali karong buntaga. Katapusan na ni niyang misa. Moretiro na siya human ini. Gisaulog karon niya ang ika-40 ka tuig sa iyang pagkapari.

Sobra napulo ka tuig na siyang Parish Priest dinhi sa parokya sa lungsod sa Karijona. Nauyonan siya’s mga parukyano. Tungod kay modulot gyud sa ilang mga kasingkasing ug konsensiya iyang wali.

"Ang tanang cash nga regalo nakong madawat ining pagsaulog nako sa ika-40 ka tuig sa akong pagkapari, akong ihatag sa Divine Love Scholarship Fund, Inc. Dunay kasamtangang 30 ka beneficiaries nga estudyante niining scholarship nato. Ug inig biya nako sa parokya, full time na kong magdumala sa maong scholarship. Dunay umaabot nga napulo ka deserving students nga madugang sa 30 ka scholar's dugang sa pari.

Puno karon sa mga tawo nga simbahan sa San Sebastian Parish. Ang mga nanimba nga may sakyanan, tua gipa-parking ilang mga sakyanan sa gym nga nahimutang ubos og diyutay sa silingang kilid sa simbahan. Kay ang parking lot gigamit sa laing kalihokan. May catering service nga ni-sponsor og pagkaon alang sa mga nanimba karon. May tulo ka tolda sa parking lot nga naglangkob og tulo ka dagkong lamesa nga puno sa nagkalainlaing putahe. Ug libut sa parking lot ang mga gilaray nga mga plastic nga lingkuranan alang sa mga dumuduong.

Nagpasalamat si Padre Efren sa Diyos nga gihatagan siyag maayong panglawas nga nakaabot siyag ika-40 ka tuig sa pagserbisyo sa simbahan. Trese anyos palang siya pagsulod niya sa seminaryo. Gisaysay niya sa katawhan ang pinakadakong babag sa iyang pagpari. Nagpasalamat siya’s Diyos nga nalabangan niya ang maong babag. Usa ka higayon, gituhop siya’s tumang kamingaw sa iyang mga ginikanan ug mga igsoon. Gusto na siyang mopauli. Gusto na siyang mobiya sa seminaryo. Nisumbong siya’s usa ka propesor sa seminaryo.

"Father, di na nako maagwanta ang kamingaw. Mobiya na lang ko sa seminaryo. Di na lang ko modayon sa pagkapari" niya pa nga nagtibi. Kaniadto, di man kapauli ang mosulod sa seminaryo.

"Sige. Tawgon nako ang spiritual director aron koyogan ka mamalit og mga kinahanglanon nimo sa imong biyahe" matud sa propesor.

Gikuyogan siya tibook adlaw, suroysuroy sa mga department store, sinehan, mga lugar nga may duawanan ug makalingaw. Gabii na silang nabalik sa seminaryo. Ug nalimtan niya ang kamingaw. Naluwas ang bokasyon ni Padre Efren, sa maong spiritual director. Mapasalamaton karon siya sa Diyos.

Taastaas ang panahon nga nahimong dacon si Padre Efren sa usa ka simbahan sa New Jersey. Sobra napulo ka tuig. Didto nahimamat niya ang usa ka Amerkanong pari nga parish priest sa simbahan didto. Aktibo ang maong pari sa pagmugna og pagdumala og scholarship fund.

Maong pagbalik ni Padre Efren sa Pilipinas, gikopya niya ang maong kalihokan.

"Mapasegarbohon ako nga mosulti ninyo nga ako nangopya lang. Wala man tingale dautan ang pagpangopya. Basta maayong buhat imong gikopya" ni Padre Efren.

Paghuman niya’g bendesyon sa katapusang hugna sa misa, giimbitar niya ang tanang nanimba.

"Kay human na ang misa, mangadto na sab ta sa lamesa," ni Padre Efren nga mapahiyomon.

Namakpak ang tanang katawhan. Standing ovation. Ug nisugod og linya ang mga gustong moapil sa salusalo. Eat all you can. Buffet style.

Daghang wa nilinya ug namauli lang. Kay sila na lay nisabot. Kay kun   ang tanan nanimba motambong gyud sa salusalo dili paigo ang mga pagkaon. Mismo ang parkong lot, dili paigo ang lugar sa gidaghanon sa mga nanimba. (Katapusan)