Anino sa Kulto

Usa niana ka udto, sa pagpauli ni Carlo gikang nakigkita ni Maj. Campo, mi-vibrate ang iyang cellphone samtang nagmaneho siya sa iyang awto. Ang maong pag-vibrate timaan nga may nanawag. Gikuha niya ang modernong kahimanan gikan sa bulsa sa iyang diyaket. Wala na niya tan-awa ang caller ID aron pagsuta kun kinsay nanawag kay ang iyang mga mata didto ra sa unahang karsada nga iyang gisubay.

Gipislit gilayon niya ang OK button ug gipaod ang cellphone sa wala niya nga dalunggan samtang ang tulo niyang kamot mao ray naggunit sa manibela sa sakyanan. Ang iyang mga mata wala ibulag sa unahang karsada nga iyang gipadulngan.

“Hello, Carlo,” tingog ni Lexie ang iyang nabati didto sa pikas linya.

“L-Lexie?” nataas ang tingog ni Carlo sa kahikugang. Wala siya magdahom nga manawag ang iyang hinigugma kaniya. Apan ang kahikugang kadali rang mitaliwan. Mibanos gilayon ang tumang kahinangop. Gipahunong una ni Carlo ang sakyanan nga iyang gimaneho aron magkasulti sila’g maayo ni Lexie. Gipalong niya ang makina sa sakyanan aron dili alingungog.

“Hain ka man karon?” nangutana si Lexie sa tingog nga paraygon ug nag-umog sa kamingaw.

“Dia pa ko sa Bohol,” laktod niyang tubag.

“Grabe ka na man sab,” nagkanayon si Lexie nga sa tuno sa tingog, natataw ni Carlo nga may gihambin kining kahiubos kaniya. “Wala ka man gyud makahunahuna’g kontak nako. Nalimot ka na man tingali nako.”

“D-dili sa ingon niana, Sweetheart,” nagkapuliki si Carlo sa pag-alam-alam ni Lexie.

Ug gipasabot niya ang dalaga sa hinungdan nganong wala siya makatingog niini. Ingon sa mibati na hinuon og kaluoy kaniya si Lexie sa pagkasayod niini nga gipatay ang iyang mga ginikanan. Mipahasubo kini kaniya. -- Sumpayan pa

Tsiks killer

Ni Cindy Jones

Nakigpanggawas na si Clea ni Mar. Apan wala pa gihapon matagbaw ang radio announcer ug giromansa niya pag-usab ang dalaga. Sa ikaduhang higayon naangkon ni Mar si Clea.

Nanggawas sila gikan sa gisudlan nila nga lodge diha sa San Jose Street nga wala gani moabut og tulo ka oras. Nabantayan ni Mar nga daw nagbakang-bakang si Clea nga naglakaw.

Miangkas dayon kini sa motorsiklo ug gihatud siya ni Mar didto sa gipuy-an niini sa barangay Mabolo. Gikan niadto, nakamatikud si Mar nga wala na mokontak pa kaniya si Clea.

Nahibaw-an na lang ni Mar gikan sa mga higala ni Clea nga ang dalaga mipauli diay sa ilang dapit sa Leyte kay namatay ang iyang amahan.

Usa ka gabii human sa programa ni Mar sa radyo, gitapuk-an siya sa iyang mga tigpaminaw nga miadto g’yud sa sibyaanan.

Usa ka sakop sa fans club ni Mar nga si Leny nangimbitar sa pista sa ilang dapit sa Talaga, Argao. Nagkasabut ang ubang tigpaminaw ni Mar nga mangadto sa pista.

“Mamista ta sa amo Kuya Mar kay Domingo bitaw ugma,” matud ni Leny. Usa ka gwapa nga tigpaminaw ni Mar, si Glo miingon nga gusto siya nga moadto apan dili siya makatultol.

May sugyot si Leny kang Glo. “Hain may maayo og moangkas na lang ka ni Kuya Mar sa iyang motor. Kamo lay pagkuyog Kuya si Glo.”

Misantop dayon sa huna-huna ni Mar nga usa na kini ka dakung pabor kaniya. “Sige, pero kaadlawon man gud ko nga mogikan aron inig ka buntag tua na ko didto.”

“Sige Kuya, hapita lang ko sa apartment kay agianan ra man ang V. Rama,” matud ni Glo. “Ok, bantay ka bitaw og dili ka makamata ha inig-agi nako,” ni Mar ngadto ni Glo. Tuod man, wala na matulog pa si Mar. Nag-andam na lang siya sa iyang dad-unon. Miirag-irag siya makadiyot sa lingkoranan sa announcer’s booth. Wala niya pagnga ang air-condition.

Nakatagpilaw si Mar ug alas 2:30 na sa kaadlawon nga siya nakamata. Hinay siya nga mitindog ug gipunit ang iyang backpack. Mipaingon dayon siya sa giparkingan sa iyang motor.

Tulin niya nga gipadagan ang motor paingon sa V. Rama Avenue, ang nahimutangan sa apartment nga gipuy-an ni Glo. Tuod man, usa ra ka serbato duna dayo’y suga sa apartment nga misiga.

Nasabtan ni Mar nga mao kadto ang kwarto ni Glo nga diha ra sa silong. Wala siya masayop kay napawong kini pagbalik ug migawas si Glo. “Dili ka lang mohapit Kuya? Pag-coffee usa,” matud ni Glo.

“Ayaw na lang Glo. Matambalan ra ang akong katugnaw kun mogakus ka na nako,” nagngisi si Mar. Miangkas dayon si Glo sa motorsiklo. Wala tuyoa nga nabag-ig sa buko-buko ni Mar ang dughan sa dalaga. (Sumpayan pa)