Usa ka pasko sa bilanggoan

Alas onse sa gabii. Disyembre 24. Naaresto sa polis si Jover, 8 anyos, kay natulog sulod sa dakong Belen sa Fuente Osmeña. Nadagsa siya sa Fuente sa pagpinangita sa iyang amahan nga si Alex. Usa ka semana nang wa nauli sa ilang barongbarong sa eskwater erya iyang amahan. Niapas ug nangita sab si Alex sa iyang kapikas nga si Glenda inahan ni Jover. Nananghid lang si Glenda nga mo-audition sa Filipinas Got Talent. Duha ka semana nang wa nahiuli.

Gituhop si Jover sa kaguol ug kabalaka dihang giagbayan siya sa polis ug hinay'ng gitulod sulod sa selda sa prisohan. Nag-ung-ong si Jover sa pultahan. May naghigda nga laing bilanggo sa puthaw nga katre. Hamtong nga lalaki. Lago ug hugaw kaayog purol ug T-shirt. Daw trapo na ang bulok sa iyang sapot. Nahadlok si Jover nga dagmalan siya ining tawhana sulod sa selda. Nagpanagana siya’g sulod. Apan dihang gitotokan niya pag-ayo ang tawo, daw kaila niya.

"Tay! Tatay Alex!" ni Jover. Niduol siya sa ngilit sa katre.

Gisirhan sa polis ang pultahang puthaw. Gitrangkahan. Ug nibiya siya. Nibalik sa iyang lamesa sa presinto.

Gialimungawan si Alex. Niliso sa iyang tuo. Nibangon. Nilingkod sa ngilit sa katre atubangan ni Jover. Nanglugod sa mga mata. “Tatay Alex! Nganong nia man ka dinhi?" ni Jover nga labihang guola nga napriso sab diay iyang amahan.

"Jover! Ikaw ni anak?" ni Alex nga nigunit sa mga abaga sa anak.

"O. Ako ni tay. Paamina ko tay" ni Jover nga niyukbo ug nigunit sa toong kamot sa amahan dungan ang pagpadapat niini sa iyang agtang.

"Gidakop man ko’s polis anak. Kay tungod sa akong kagutom ug kalapoy, nakatulog ko sa sulod sa dakong Belen sa Fuente. Abi nako’g si Maria si mama nimo. Agid-agid man silag hitsura ug sa gidak-on" ni Alex.

"Mao sab ko tay. Nakatulog kos sulod sa Belen. Abi nako’g ikaw si Jose" ni Jover. Nagkinataw-anay sila.

"Malipayong Pasko anak" ni Alex.

"Malipayong Pasko sab tay" ni Jover.

Gigakos ni Alex ang anak sa tumang pagpangga.

"Abi nimo anak, di ta magutman dinhi. Kay daghang manghatud og pagkaon sa mga polis. Unya hatagan sab ko nila. Yuna pa, kadiyot" ni Alex.

Niliso ngadto sa iyang luyo. Giukab ang unlan. May gikuha ilawom sa unlan.

"Nia anak. Basig gigutom ka," nitunol sa bata og usa ka dakong mansanas nga pula.

"Salamat tay" gidawat dayon ni Jover. Sa dakong kahinangop. Giingkiban dayon ang prutas.

"Gihatagan ko’s polis ganiha og duha. Gikaon nakong usa. Gitagana nako para ugma ang usa. Niabot man ka. Di para na nimo" ni Alex nga mapahiyomon. Gihapuhap ang ulo sa anak.

"Unya tay. Nakit-an na nimo’s mama?" ni Jover nga nagsimual. Nanghupaw si Alex.

Lawom ang gihunahuna. Nanglantaw sa halayo. Bisag way bintana sulod sa selda nga gilibutan sa upat ka bongbong semento.

"Nagtuo ko anak nga nadawat si mama nimo sa audition. May talento man siya. Maayo mokanta. Maayo mosayaw. Nindot og tingog. Ug labi sa tanan maayo’g hitsura. Pagkakita gyud nako sa estatuwa ni Maria nga sama sa tinood nga tawo kadako, abi gyud nako’g si mama nimo" ni Alex.

"Unya tay, kun nadawat man kaha si mama, di diay siya magpahibawo nato?" ni Jover.

"Basig wa nay higayon anak. Gadali siya nga makakuyog sa workshop" ni Alex.

"Basin pa tay" ni Jover. Malaumon. "Di ba lang ta maninguha nga makagawas dinhi?" ni Jover.

"Way problema anak. Samtang tua ta’s gawas, maglisod pa ta’g pangita og makaon. Pamasura ra goy panginabuhi nato. Samtang dinhi sa sulod, pinakaon ta. Sementado pa atong balay. Guwardiyado pa. Safety kaayo ta dinhi anak. Natuman sab atong pangandoy nga makapuyo tag balay nga semento" ni Alex nga mapahiyomon.

Ug nipakapaka ang butobuto sa nagkadaiyang pabuto sa gawas.

"Merry Christmas tay" ni Jover.

"Merry Christmas anak" ni Alex. Naggakos na usab sila. (Kataposan)