Tsiks killer Gula 8

Naalinggatan ni Mar nga nagsusapinday na’g gamay ang linaktan ni Clea bisan og dili daghan ang nainom niini nga beer.

“Asa to dapit ang inyo Day?” ni Mar pa nga mitutok sa namuwa nga dagway ni Clea.

“Sa kuan ra Kuya Mar, dapit bitaw sa Salinas Drive sa Lahug. Ako’y drive sa motor bi,” nagpahiyom si Clea nga migunit sa bukton ni Mar.

Wala mosugot si Mar. “Ayaw Day kay nakainom ka ra ba unya wala ka pay lisensya basin og madakpan ta sa CITOM.”

Misakay si Mar sa motor. Miangkas usab dayon si Clea sa luyo. Nakita nila nga nagwara-wara sila si Luz Cambal sa bentana sa balay nga nagpahiyom nga nagtan-aw nila.

Pag-arangkada na’g padagan ni Mar sa motorsiklo nakalit niya paglubag ang gasolinador ug miigpot ang motor. Wala tuyoa nga nakagakus si Clea sa iyang hawak aron dili matagak.

“Sigi Day, gakus na lang nako para dili ka mahulog pero maghinay-hinay lang ta’g padagan sa motor,” giingnan ni Mar ang dalaga.

Lalim kaayo ang gibati ni Mar nga sa unang higayon nagkabag-id ang ilang kalawasan ni Clea.

May nahuna-hunaan si Mar. Gipawong niya ang makina. Gitumong niya didto sa mingaw nga lugar sa San Jose, usa ka gamay nga karsada nga molapos sa General Maxilom Avenue.

Gitindak-tindakan niya ang motor, wala g’yud moandar. “Papahuwayan usa nato Day kay basin nalumos lang sa gasolina ang karborador,” ni Mar pa.

“Hala kamingaw dinhi Kuya Mar uy, basin og dunay dili ingon nato dinhi kay dagku kaayo ang punoan sa kasya,” matud ni Clea nga migunit sa bukton ni Mar.

Giagbayan ni Mar si Clea. Milingkud si Mar sa motor ug gipasandig niya si Clea kaniya. Dayon iya kining gihagkan. Ang nanginit na nga si Clea, miatubang ni Mar.

Mipilit ang lawas ni Clea sa lawas ni Mar ug dungan kini nga gigakus sa announcer ug giukoban ang mga ngabil.

“O, pagkatam-is mo gayud Clea, Day. Pwede ba og dili usa kita mamauli?” ni Mar.

“Asa pa man diay ta Kuya Mar?” matud ni Clea. “Basta lang, gusto ko nga malipay ta karong gabhiona, dili maayo nga makit-an ta dinhi og dili ingon nato nga maghagkanay,” tubag ni Mar.

Gitindakan ni Mar ang krang sa motor. One click ra og andar dayon. Misakay dayon si Clea ug mipasirit si Mar. Nakahuna-huna si Mar nga sa unahan dunay usa ka pension house.

Misulod si Mar sa parking area. Gigunitan niya si Clea ug mipaingon sila sa front desk. “Short time lang mi Bay.”

Gidawat ni Mar ang yawe ug mipaingon sila sa Room 202. (Sumpayan pa)