Hinog sa punoan

Gula 13

“Unsa may atong buhaton karon, Tay?” Gipahunat ni Urielle ang desisyon sa iyang amahan.

“Wa nay laing paagi, Day Urielle,” ni Noy Sidro pa. “Mangutang ko’g dugang kantidad ni Don Emilio Arcanghel.”

“U-unsa?” Nakugang si Urielle. “Pero mosalig kaha si Don Emilio kanimo, Tay, sa pagpautang sa ingon kadako nga kantidad?”

“Suwayan ko lang. Pasabton ko siya sa matuod nga hinungdan. Kun mahimo magpakiluoy ko. Mosugot ko nga magpaulipon kaniya sa tibuok kong kinabuhi basta maluwas lang ang imong inahan.”

Wala lang tuyoa nga daw natukbil ang balatian ni Urielle sa gipanulti sa iyang amahan. Wala niya kapugngi ang paghilak.

Gialam-alaman ni Noy Sidro si Urielle.

“Ayaw paghilak, Urielle,” matud ni Noy Sidro. “Pag-ampo hinuon nga molampos ko sa akong tuyo ni Don Emilio Arcanghel.”

“Nahimangod lang ko, Tay,” matud ni Urielle. “Kun di pa unta ta pobre, di unta ta makasinati og suliran nga ingon niini.”

“Di lang ta magpakawala sa paglaom. May kaluoy ang Dios.”

Wala makatingog si Urielle. Gipahiran niya ang iyang mga luha. -- Sumpayan pa