Tsiks killer

Gula  7

Daw sa natuk-an si Clea dihang giingnan siya ni Mar nga “I love You.”

Wala siya magtoo nga litokon kadto sa kinaham niyang radio announcer. Taud-taud, nakatulon ra g’yud og laway si Clea, nakatingog na siya. “Hala, nanguyab ka nako Kuya Mar?”

“Buyno, imo man g’yud ko nga gipugos Day Clea kun nganong gipig-it nako og hugot ang imong kamot, tug-anan ko na lang ikaw nga In-Love ko nimo. Unsa man Day, gisugot na ko nimo?” hilom nga nagngisi si Mar.

Nagkabunga-bunga tawon og panubag ang gwapa nga dalagita. Taud-taud mitubag kini pinaagi sa pag-ingon “Huna-hunaon usa nako Kuya Mar.”

Matag human sa programa sa radyo ni Mar kanunay g’yud nga maglumba ang mga tigpaminaw niya pagkontak kay gusto nga makig-estorya sa paborito nila nga announcer.

Apan abtik si Clea. Wala pa gani mahuman ang programa motawag na siya ug dili na niya ibutang ang telepono aron sigurado nga sila ang magka-estorya ug si Mar.

Hangtud nga gisugot g’yud ni Clea si Mar apan hilom kaayo ang ilang relasyon. Dili buot si Clea nga mahibaw-an sa ubang tigpaminaw sa programa ni Mar nga duna silay relasyon.

Usa ka Domingo, sayo si Clea nga miadto sa opisina ni Mar sa estasyonan nga gialagaran niini. Giromansa ni Mar si Clea, swerte nga wala sila maabti sa laing mga listeners nga mikalit lang pag-abli sa iyang opisina.

“Kuyawa nako Kuya Mar uy abi nako og maabtan ta. Ikaw man gud manghawok man ka bisan nga wala gi-lock ang pultahan,” matud ni Clea nga miparayeg kaniya.

May misantop sa huna-huna ni Mar. Iyang suwayan si Clea panghangyo. “Pwede ba og makig-date ko nimo Day? Kanang walay makasamok nato.”

Misiga ang mga mata ni Clea. “Asa man ang imong gusto? Imo unya kong binuangan Kuya Mar.”

“Dili lagi Day. Gusto lang ko nga magtagbaw og kiss sa lamurok kaayo nimong aping. Lami kaayo nang sigihan og hawok Day,” matud ni Mar dungan sa pagpislit sa aping sa dalaga.

Wala dayon motangdo si Clea sa awhag ni Mar nga mag-date sila. Apan dihang nagka-estorya sila usa ka gabii human sa programa ni Mar, wala gayud makabalibad si Clea.

Birthday sa usa ka tigpaminaw ni Mar nga si Luz Cambal. Parehong giimbitar sila si Mar ug Clea sa maong okasyon. Wala kabalibad si Clea sa tanyag sa mga barkada nga moinom sila’g beer.

Hapit na alas 12 sa gabii. Nananghid si Clea nga mopauli na. “Uy, kinsay imong kauban Day?” daw nahingawa si Luz.

Dali nga mibulontaryo si Mar. “Ako na lay hatud ni Clea sa ilang balay Luz kay dili usab ako magdugay.” (Sumpayan pa)