Anino sa kulto

GULA 95

Nangandam si Carlo. Nagtuo siya nga siya’y gipanid-an sa mga sakay sa maong awto. Wala tuyoa, nahiram niya ang .45 kalibreng pistola sa iyang hawakan samtang ang iyang mga mata didto ra sa itom nga awto.

Ang awtong itom midali pagbiya gikan sa eskina nga gihunongan niini. Ingon sa nakasabot ang mga sakay niini nga namatikdan sila ni Carlo. Wala na mokompiyansa si Carlo. Naggunit nang daan ang tuo niyang kamot sa puloan sa iyang armas nga gisuksok sa iyang hawakan samtang naglakaw siya paingon sa nahimutangan sa iyang sakyanan. Nanagana siya kay basin mokalit pagbalik ang awtong itom ug rakrakan siya sa mga sakay niini -- sama sa nahitabo nila ni Belen nga gipaulanan og mga bala sa mga tawong nanagmaskara nga nagsakay sa awtong itom.

Apan wala mobalik ang awtong itom. Gipaandar na lang ni Carlo ang makina sa awto human siya makapahimutang sa atubangan sa manibela niini. Gipadagan niya ang sakyanan. Samtang nagmaneho, kilas ang mga mata ni Carlo. Nagpaningod siya sa palibot. Wala gayod siya mokompiyansa ilabi na kun molabang siya og eskina. Sutaon una niyang daan kun wala bay awtong itom nga naghunong. Basin kun giatangan siya sa mga kaaway nga nagpaniid kaniya.

Pag-abot niya sa usa ka eskina unahan og diyotay sa merkado, miliko siya ug mao nay gisubay ang dalan paingon sa iyang gipuy-an. Wala madugay, nasigpatan ni Carlo didto sa side mirror sa iyang awto ang usa ka sakyanan nga nagsunod kaniya.

Kalit lang kaayong gikulbaan si Carlo.

Nangandam si Carlo Guieb. Natahap ang iyang hunahuna nga siya’y tuyo sa mga sakay sa awto nga nagsunod kaniya. Gipakusgan niya ang pagpadagan sa iyang gisakyan. Matag karon ug unya mopasigpat siya sa side mirror. Iyang nasuta nga dili ang awtong itom ang sakyanan nga nagsunod kaniya. -- Sumpayan pa