Si Pekta nga kondenada

Matahom si Pekta inubanan sa maanindot niyang lawas. Gani nahimo siyang 'beauty queen' sa ilang baryo atol sa tinuig nilang pagsaulog sa pangilin sa ilang baryo usa ka tuig na ang milabay.

Maarang arang ang ilang kahimtang ug wa sila maglisud sa inadlaw-adlaw nilang panginabuhi ug panginahanglan.

Daghang mga kalakin-an ang naibog kang Pekta nga gawas sa iyang kaanyag relihiyosa usab kini. Ang labihang naibog kaniya mao sila si Poldo ug Oscar.

Usa ka gabii niana, samtang nag-inom og tuba si Poldo ug Oscar sa tindahan ni Inse Basing, nagkulokabildo sila.

"Bay Poldo, nakamatikod kong may pagtan-aw ka kang Pekta, diba?" sukna ni Oscar sa hinay'ng tingog aron di madunggan sa ubang nag-inom sa tindahan. "Aw, kinsa gud nga lalaki ang di maibog niya, hasta gani ikaw mao man sab," mubong tubag ni Poldo.

"Unya, unsa may laraw nimo nga pareha man tang duha nga daku’g gusto niya?" pangutana ni Oscar. "Aw, sayon ra na. Atong lugoson ug pahimuslan maayo dayon patyon aron di makasulti sa krimen. May panultihon bitaw nga 'dead persons tell no tale".

Nangita dayon og tukmang higayon ang duha sa paghimo sa ilang plano. Usa ka higayon niana, nagabhian sa pagpauli si Pekta gikang nangompra gikan sa baryo. Tungod kay suoton naglisud pagsud ang trysikol lahos sa ilang balay kay batoon pa gyud ang agianan. Nagbaktas na lang siya paingon sa ila da ang kinompra.

Pag-abot niya sa awaaw nga dapit kalit siyang gibunlot ni Poldo paingon sa kalibunan nga gisap-ongan ang baba. Laktod nga estorya nakuha gyud ang iyang pagkababaye niadtong higayona ug gipatay pa gyud siya pinaagi sa pagdunggab og pagbusdak sa dakung bato sa iyang ulo. Walay nakatabang kang Pekta ug daling misibat si Poldo ug Oscar palayo sa maong dapit.

Labihang kaguol sa iyang mga ginikanan sa maong hitabo. Paglabay sa unom ka buwan tapos sa paglubong, nahibung ang katawhan sa ilang dapit kay matag abot sa tungang gabii, makita nila ang usa ka babaye sa giwang sa ilang bongbong nga naglakaw. Nagsul-ob kinig itom nga sapot ug ang mga tiil niini nagguyod og kadena.

Mao gyud to’y talan-awon matag tungang gabii nga nakapapugos sa pagpaampo nila ni Poldo ug Oscar ngadto sa kapolisan. Gumikan niini, si Pekta nga kondenada wala na. Ang tawo nga kriminal kun di siya masakpan sa kamot sa balaod moampo gyud sa kaulahian gumikan sa paghasol ug pagtulisok sa iyang tanlag kon konsinsya. (Kataposan)