Anino sa Kulto

Nahilom na usab si Carlo. Nasuta niya nga daghan diay kaayo’g nasayran si Padre Daniel mahitungod sa Tambayawan. Wala gayod siya masayop sa iyang pakigkita niini. Nadugangan ang kasayoran nga iyang nahipos mahitungod sa Tambayawan. Makahatag kini kaniya’g ideya kun unsaon pagpakigbatok sa maong kulto.

Wala madugay, nanamilit na si Carlo kang Padre Daniel. Apan mipasidaan siya sa pari nga mobalik siya sa higayon nga magkinahanglan siya niini. Gipasaligan siya sa pari nga bukas kanunay ang kombento ug ingon man ang simbahan alang kaniya. Nahinangop si Carlo sa gisulti sa pari. Ang suportang moral niini nakahatag kaniya’g dugang kasibot sa paglumpag sa kultong Tambayawan.

Gikan sa Simbahan, si Carlo milahos sa gipuy-an ni Tiyo Berto ug Tiya Marta niya. Gusto siyang magsusi sa ilang kahimtang. Wala na sila mahiduaw kaniya human sa pangadye sa mitaliwan na niyang mga ginikanan. Mao nga midalikyat siya karon aron pagpangumosta kanila.

Sa sala, nagsultihanay silang tulo -- si Tiyo Berto, tiya Marta ug Carlo. Si Belen may gilakaw. Nagpakisusi gilayon sila kun may resulta na ba sa gihimo niyang imbestigasyon sa kamatayon sa iyang mga ginikanan. Gitug-anan niya sila nga ang kulto nga Tambayawan maoy iyang primary suspect sa kamatayon sa iyang mga ginikanan. Nakugang sila sa kasayoran nga iyang gitug-an.

Wala magdugay si Carlo sa balay nila ni Tiyo Berto ug Tiya Marta. Apan paggawas niya sa koral nga hollow block sa maong balay, diha dayo’y iyang namatikdan. Napahunong si Carlo sa paglakaw. Didto sa unahan sa atbang nga eskina, nalantawan niya ang awtong itom nga nag-parking. Mitingkag ang iyang mga dalunggan. May milabok sa iyang hunahuna pagkakita sa maong sakyanan. Mao kini ang gisakyan sa mga tawong mipusil nila ni Belen didto sa iyang gipuy-an. -- Sumpayan pa