Ang pinaskohan nga dili ko pa angay'ng ihatag

Nadungog gyod nako ang pagkuriring sa telepono nga didto mahimutang sa duol sa talad ni Roland Cejas, ang Security Guard sa Phil Bank nga maoy in-charge sa pagtubag sa mga tawag gikan sa gawas. Siya usab ang tigtaho kanamong nagtrabaho sulod sa opisina kun kinsa kanamoy gitawag.

Mibarog dayon ko sa dihang akoy gisenyasan ni Roland nga alang diay kanako ang tawag.

"Ako diay ni, Land?" sukna ko nga midawat sa gitunol niya nga telepono.

"Oo, gikan sa imong...." wala niya tiwasa ug ginuntan niya sa hinay'ng katawa.

"Good afternoon, hello...?" nako pa. "Liz?" sangpit sa pikas linya, si Ric akong uyab. "Adto ko magpaabot sa silong sa SM, ha, didto sa Foodcourt.":

"Oo, sige paabota ko after 5:00 o'clock."

Samtang nagdagan ang taksi nga akong gisakyan paingon sa dakong Mall sa rekli, kalit lang mikulba ang akong dughan. Mao man god dayoy misantop sa akong hunahuna nga paninglan na usab ako sa pinaskohan nga maoy kanunay'ng hisgotan ni Ric, kanako. Tungod niini nakutaw ang akong hunahuna kun ihatag ko na ba niya o dili ba? Porbida mao gyod ni kanunay'ng mosantop sa akong hunahuna ug maoy nakahatag kahasol kanako. Pipila na ka semana nga mao kini among ma-topic o mahisgotan -- kanang magkuyog kami sa pagpanglakaw ug bisan kanang mangaon mi sa mga kan-anan sa mga dagkong mall. Morag aboton nalang kog sapot kanang mohisgot na niini si Ric.

"Gilainan na baya ko niini, Ric, uy!" nakasulti kog kausa niini kaniya. "Nganong lainan man ka? Pila ra may pagtangdo nimo, Liz?"

"Oo, lagi pila ray pagtangdo. Apan mora lagig kiwawan kaayo ko sa pagtangdo, uy! Kiwaw gyod kaayo para nako!"

"Kiwaw ba? Ingna la'g Oo! Okay na!" Wa na lang ko motingog. Naglabi gyod ang kasamok sa akong hunahuna. Bug-at gyod sa akong konsensiya ang iyang gitinguha. Kabalibaron na gyod ko ni Ric!

"Da uy!!!!" nalitok ko ni og nakahapak ko sa kuhen sa luyo sa sandiganan sa drayber. Namatikdan ko nga mitan-aw ang drayber sa salamin diha sa iyang atubangan aron pagsuta sa nahitabo kanako.

"Excuse me, Ma'am," sa drayber pa, "may problema ka, Ma'am?"

"Ha? Wa-wa man, Dong..." tubag ko.

"O-okay ka lang, Ma'am?"

"Okay lang," tubag ko, "okay pa sa alright, Dong."

Unya, nahilom ang drayber ug nagpadayon sa iyang pagkupot sa manobela aron pagseguro sa iyang pagpadagan sa sakyanan.

Nahilom na lang sab ko. Apan sa akong hunahuna nangesena pag-usab ang mapugsanong hangyo ni Ric kanako. Dili man unta lisod ang paghatag ning pinaskohan nga buot niyang pangayoon nako, kun wala pay nahitabo nako kaniadto sa una kong uyab. Pipila na ka mga higayon nga amo nang nahimo ang maong ritwal nga alang ra unta sa mga magtiayon. Apan wala kami suwerte nga nagkabulag og naminyo siyag lain og atua na manimuyo sa Las Vegas, Nevada.

Ang gikahadlokan ko, dili ba kaha unya malain si Ric kun mahibaw-an niya nga dili nako birhen? Nagtuo ra ba gyod ko nga nagtuo gyod si Ric nga wa ko makasuway'g uyab. Wa man god ko mosulti niya niini. Dili kaha mausab ang iyang paghigugma ug kaayo nga gipakita kanako? Nahadlok ko, nahadlok gyod ko nga mao lang kini hinungdan nga magkabuwag mi! Dili ko gusto nga mao kanay mahitabo kanamo!

Ang tubag unya ning akong dakong suliran, anaa ra gyod sa hukom unya ni Ric ning amo karong pagkita aron pagtuman sa among sabot kun ihatag ko na niya ang pinaskohan ko alang kaniya! (Kataposan)