Tsiks killer

Gula 3

Ganado kaayo si Kuya Mar nga nagdumala sa iyang programa nga diha sa iyang kilid si Carmen.

Namatikdan ni Mar nga gisigihan siya’g tutok ni Carmen samtang magsulti siya atubangan sa microphone. Nangabut pa gayud ang ubay-ubay’ng mga bisita ni Mar.

Sakop sila sa organisasyon ni Mar, ang Handumon Ko Ikaw Fans Club. Sagad kanila mga babaye ug pipila ra kabuok ang mga lalaki. Matag patugtog na ni Mar og sonata, iyang pakigsultihan si Carmen.

“Daghan diay ang manganhi ug mamisita nimo sa programa Kuya Mar? Pwede ra og magkanunay ko nga moanhi?” ni Carmen pa nga paraygon kaayo og tingog.

“Sure, malipay g’yud ko kun dia ka kanunay sa akong kiliran,” bulatik ni Kuya Mar. Tuod man, sunod gabii, diha na usab si Carmen. Misamot ang kasiksi niini ug kaanyag. Daw nagpaibog g’yud ni Mar.

Sa ilang panagsultihanay, gipangutana si Mar ni Carmen. “Unsay imong sakyanan Kuya Mar?” Mauwawon kaayo si Mar nga mitug-an nga motor ra intawon ang iyang sakyanan. Apan nasabut niya nga nalipay si Carmen.

“Hala, gusto kaayo ko nga makakat-on og drive anang motor Kuya Mar. Tudloi ko bi ako lay palit og gasolina,” matud ni Carmen nga nagpahiyom. “Sigi, human sa akong programa mag-driving ta,” dali nga tubag ni Mar.

Human sa programa, nagpahiyom nga nanamilit ang ubang mga bisita ni Mar. “Adto na lang mi Kuya kay mora’g busy kaayo ka sa imong special nga bisita.”

Gipataud-tauran usa ni Mar usa sila manglakaw si Carmen. Gibana-bana ni Mar nga layo na kadtong uban niyang mga fans aron dili makakita nga moangkas sa iyang motor si Carmen.

Didto sila mopaingon sa North Reclamation Area. Nagpadayon pa ang pagtukod sa higanteng tindahan, ang SM City. Gipahunong ni Mar ang motorsiklo ug nanaug siya.

Si Carmen maoy gipalingkud niya atubangan sa manobela ug siya didto na sa luyo apan ang iyang duha ka kamot miabag gihapon paggunit sa manobela aron makaapil siya pag-balance nga dili sila matumba.

Hapit na lang magakus ni Mar si Carmen samtang ang iyang nawong magbag-id-bag-id na usab sa wala nga aping sa dalaga. Wala kalikayi ni Mar nga mituskig paghinay-hinay ang iyang armas sa maong sitwasyon.

Sa unang higayon, abag-abagan pa ni Mar si Carmen. Apan paspas kaayo nga nakat-on si Carmen kay matud niya maantigo man siya nga mobisikleta.

Hangtud nga naabtan na lang sila og mga alas dos sa kaadlawon sa sigi og tuyok-tuyok sa north reclamation area. Nadani g’yud sa Mar kay nangalimyon ang kahumot ni Carmen. (Sumpayan pa)