Hubo nga kamatuoran

Pasko na usab ug napuno sa nagkadaiyang dayandayan ang kadalanan, kabalayan, mga buhatan. Department store, mall ug sibaw na usab kaayong mabati ang gipatukar nga mga paskohanong awit niining panahona.

Gianinaw ni Cheska ang palibot sa mall nga iyang gisudlan ug iyang nakita ang kamaya sa katawhan nga nag-iyahay sa pagpamalit og regalo nga ilang ihatag ngadto sa ilang mga mahal sa kinabuhi.

Alang kang Cheska ang maong talan-awon wala’y kalainan sa usa ka pelikula nga subli mong makita sa higayon nga ibalik kini sa pagpasalida sa mga sinehan.

Walay kalainan sa usa ka awit nga makapahinumdom sa imong kagahapon sa matag higayon nga subli mo usab kining mabati sanglit ang maong awit nagtangkil man sa mga panghitabo sa imong kinabuhi. 

Misulod si Cheska sa usa ka de kalidad nga kan-anan sa sulod sa mall nga iyang nahimutangan ug mipahimutang sa paglingkod.

Ang maong de kalidad nga kan-an nga iyang gisudlan nahimo na nga kabahin sa iyang kinabuhi sanglit sa maong dapit man usab niya ikahibalag ang usa ka binuhat nga maoy iyang natingban sa pagmahal ug pagpangga.

Gitawag niya ang waiter alang sa pag-order sa bugnaw nga mainom ug unya.

“M-mahinungdanon kining itug-an ko karon kanimo,” nagkanayon si Apolo nga namulong sa ilang panagtagbo ni Cheska sa sulod sa maong kan-anan. “M-mahimong imo akong kasilagan human ka unya masayod niini.”

“H-hha? daw   ni Cheska pa nga gibati og kahingangha. “N-ngano man?”

“Ang tinuod Ches,” sumpay ni Apolo sa iyang pamahayag. “G-gikahibalag ko na ang babaye nga nakahatag sa…”

“H-husto na,” dali nga sagbat ni Cheska human makasabot sa buot itug-an ni Apolo kaniya.

Milungtad na og lima ka tuig ang ilang relasyon ug gihatag niya ang tanan ngadto sa ulitawo tungod sa daku niyang gugma apan usa lamang ka butang ang dili niya ikahatag mao ang pagbaton og anak nga maoy bunga sa ilang pagminahalay.

“Hisabtan ko ikaw Apolo,” ni Cheska pa nga migunit sa kamot sa iyang hinigugma. “Dugay ko kining gipangandaman sanglit nasayod ako nga dili ko ikahatag kanimo ang ikahatag sa usa ka tinuod nga babaye.”

“Hello!” ni Laling pa nga nahiabot sa maong dapit nga kuyog usab sa ilang mga barkada nga nagkinagang sa pagdala sa ilang regalo alang sa ilang barkada nga si Francisco Maghanoy sa tinuod nga kinabuhi.

“Hi!” timbaya usab ni Cheska nga nahipugwat gikan sa halawom nga paghunahuna.

 “Merry Christmas,” mitagsa-tagsa sa paggakus kang Cheska ang iyang mga barkada nga sama usab kaniya usa ka babaye nga nabilanggo sa lawas sa usa ka lalaki. (Katapusan).