Gula 7
“Unya, Tay,” ni Urielle pa. “May kuwarta kitang magamit?”
Wala makatingog si Noy Sidro.
Naluoy si Urielle sa iyang amahan. Nasayod siya nganong wala kini makatubag sa iyang pangutana. Nahibalo siya nga wala kini kuwarta nga ikapatambal sa iyang inahan.
“Mangita ko’g paagi, Urielle,” nitingog si Noy Sidro paglabay sa pipila ka daklit. “Mosuway ko’g hangyo sa akong mga igsuon.”
“Mas maayo pa tuod, Tay,” nagkanayon si Urielle. “Unahag duol si Tiyo Miano kay siya man ang medyo arangan sa imong mga igsuon.”
Wala mag-usik og panahon si Noy Sidro. Milakaw gayod gilayon siya aron pakigkitaan ang iyang igsuon samtang si Urielle mahingawaon nga nag-apong sa masakiton niyang inahan.
Sa pag-uli ni Noy Sidro, namatikdan ni Urielle nga huyhoy ang mga abaga niini. Sa iyang nakita, ingon sa napangagpas na ni Urielle kun unsay resulta sa lakaw sa iyang amahan. Bisan pa man, miparabulas gihapon pagpakisayod ang dalaga.
“Way kuwarta ang imong Tiyo Miano, Urielle,” nagkanayon si Noy Sidro. Bag-o lang siyang mibayad sa eskuylahan nga gitunghaan ni Jennifer didto sa siyudad sa Sugbo.”
“Ang uban diay nimong igsoon, Tay?” Sukit ni Urielle. -- Sumpayan pa