Anino sa kulto

Gula 89

“Nia na sila sa Mabini, Padre,” matud ni Carlo uban ang pagpangompas sa iyang kamot. “Aktibo na kaayo sila dinhi sa ato. Gani, misugod na sila paghimog kadaot sa mga lumolupyo sa Mabini.

Igo lang nagpanglingo ang pari. Ingon sa wala kini magdahom sa makapakurog nga kasayoran nga gihatod ni Carlo karong buntaga.

“Ngano man, Padre?” Daw wala sa hunahuna nga nangutana si Carlo. “Ngano nga may mga tinuohan man nga ingon niini?”

“Balikon ko, Mr. Guieb,” matud sa pari human makaginhawa’g lawom. “Gawasnon ang tawo sa pagpili sa iyang relihiyon. Dili nato makontrolar ang pagdagsang sa ubang tinuohan. Okey ra man kana basta dili lang sila magmugna og kadaot sa katilingban. Total, Dios man usab ang ilang gisimba.”

“Apan ang mga kulto, Padre? Unsay imong ikasulti?”

Miginhawa na usab og lawom ang pari. Ug dihang namulong miingon kini: “Tungod kana kay ilang giabusohan ang kagawasan sa pagpili og relihiyon. Sayop ang ilang pagsabot niini mao nga nahatipas sila sa matarong nga dalan sa kinabuhi.

Daghan pag gustong masayran si Carlo Guieb gikan ni Padre Daniel. Mahinamon siyang nagpaabot nga mamulong pag-usab ang pari. Apan nakita niya nga nagpakahilom na kini. Busa naniksik siya sa lawak sa iyang hunahuna og bisan unsa nga angay niyang isukot ngadto sa pari.

Tuod man, kadali ra siyang nakahulbot og pangutana.

“Daotan ba ang tanang kulto, Padre Daniel?” sukit niya.

“Dili nato ma-generalize ang atong conclusion bahin niana, Mr. Guieb,” matud sa pari. “Depende kana sa kulto. Daotan kun daotan ang lintunganay’ng tumong sa maong kulto. In fact, may mga kulto nga ang mga sakop may abilidad sa panambal.

Kini nagmatuod nga maayo ang kulto kun mao gayoy sagopon niini ang katarong. Hinuon, daghan gyud ang mga kulto nga misagop sa binuang. Usa niana ang Taliban religious militia sa Afghanistan. Diyotay lang tingali ang nasayod nga ang Taliban sa lintunganay usa gayod ka kulto. Ang maong kulto maoy naghatag og proteksiyon sa bantogang terorista nga si Osama bin Laden.” -- Sumpayan pa