Palihog kuno Raffy ayaw na ko og samuka! Hunong na sa imong pagsamok samok nako gusto ko og kalinaw sa akong hunahuna. Wala nako mahigugma nimo! Dili ka kasabot nako?
Mao kini ang masuk-anon nga hangyo ni Em-Em ngadto ni Raffy samtang naglingkod siya sa iyang lamisa.
Si Raffy usa usab ka estudyante nga nagtungha sa usa ka unibersidad sa Sugbo. Ug si Em-Em sama usab ni Raffy nga nagtungha usab sa koliheyo sa kursong pagkamaestra.
“Human ko nimo gipahilak ug gipasakitan ang akong kasingkasing, karon makig-uli ka nako? Dili nako,” matud pa ni Em-Em nga gibati og pagmahay.
“Sure jud ka Em nga dili na ka nako?” Sukot ni Raffy ngadto sa dalaga. “Oo dili nako nimo bahala og wala koy hinigugma! Makig-uli ka nako nga naa na man kay laing hinigugma?” Pangutana ni Em-Em nga medyo gibati og kasakit sa iyang dughan.
Dili man gud ikalimod sa iyang kaugalingon nga nahigugma pa siya ni Raffy kay taudtaod man usab silang managhigugmaay kaniadto.
“Basta Raffy dili na jud ko.” Mao kini ang nakab-ot nga hukom ni Em-Em. Nagdumili na gayod siya sa pakig-uli ni Raffy tungod sa gibati niyang kasakit sa iyang dughan.
Kay kini si Raffy grabe ang iyang pagka-checksboy. Bisan og uyab pa sila kaniadto mag-sideline gihapon kini.
Hangtod nga usa ka higayon nasakpan gayud ni Em-Em.”
Pasayloa lang ko Em gud andam nakong buhaton ang tanan makig-uli lang ka nako unya magpakasal dayon kita. “Matud pa ni Raffy nga gibati og kahinam.
“Sige kung mag-usab ka sa imong kaugalingon unya magtarong ka sa imong pagtungha dayon makahuman ka makigminyo ko nimo,” ni Em-Em pa nga grabe ka seryoso.
“Apan sa usa ka kondisyon nga dili kita magkita ug magkita lang kita sa tukmang panahon.”
“Sige uyon ko sa imong kagustohan Em, andam nakong buhaton ang tanan alang sa katumanan sa akong mga damgo,” ni Raffy pa.
Paglabay sa mga katuigan nakahuman gayod si Raffy sa iyang pagtungha. Nahimo na siyang polis. Si Em-Em usab nakahuman na sa pagtungha unya nahimo na siya nga maestra. Hangtod nga nakahunahuna si Raffy sa iyang mga saad ngadto ni Em-Em.
Ug iya nang giplano ang adlaw unya sa ilang kasal. Ug niadto siya sa panimalay ni Em-Em aron pagtuman sa ilang kasabotan apan usa ka dautang balita ang nisugat kaniya paghi-abot sa pinuy-anan ni Em-Em ang babaye nga nakapausab sa iyang kaugalingon naminyo na ngadto sa laing lalaki. Ug dugay na kini nilarga sa laing nasud. Ug kalit nga midag-um ang panagway ni Raffy. Grabe ang iyang gibati nga kasakit sa iyang kasingkasing ug nakaingon siya sa iyang kaugalingon nga makagaba gayud diay ang mga babaye. Ug sukad sa maong hitabo wala na si Raffy mahigugma sa laing babaye. (Kataposan)