Gula 88
Nakapahiyom og kaswal si Padre Daniel. “Ngano man diay, Mr. Guieb? Dugay na mang nakasulod dinhi ang laing mga relihiyon sama sa Iglesia ni Cristo, Saksi ni Jehovah ug uban pa. Apan dili sila hulga alang sa Simbahang Katoliko. Pasagdan lang nato sila. Ang tanang tawo adunay kagawasan pagpili sa ilang tinuohan.”
“Dili kana sila ang akong buot ipasabot, Padre,” pasabot ni Carlo. “Ang akong gipasabot mao ang kulto nga Tambayawan Black Brotherhood. Makuyaw kining maong pundok. Dili lang sila hulga sa Simbahang Katoliko kundili hulga gayod sila sa seguridad sa tanang mga lumolupyo niining lungsora.”
“Wala ko ikaw hisabti, Mr. Guieb,” sa pari pa.
“Paminaw, Padre,” ni Carlo. “Ang Tambayawan mao ang primary suspect sa mga krimen nga nahitabo dinhi sa Mabini, lakip na ang kamatayon sa akong mga ginikanan. Ug ni Dr. Castro nga gipatay kagabii pa lang.”
“G-gipatay si Dr. Castro?” nakasuna ang pari sa kahikugang.
“Oo, Padre,” ni Castro.
Gisaysay ni Carlo ang mga katarongan kun nganong ang kulto maoy ilang gidudahan nga responsable sa mga krimen nga nahitabo dinhi sa Mabini. Gitagsa-tagsa niya pag-at-at ang mahinungdanong mga anggulo aron gayod masabtan sa pari ang tanan. Tugob sa tin-aw nga mga detalye ang iyang pagpasabot ngadto sa pari.
“Kun mao kana,” nagkanayon ang pari human sa iyang pag-asoy,” delikado diay ang kahimtang sa katawhan karon tungod sa mga sakop sa Tambayawan?” “Mao kana, Padre,” ni Carlo pa.
Nakita ni Carlo nga miliraw ang mga mata ni Padre Daniel. Ingon sa aduna kini gihunahuna. Unya pagkataudtaod, miigham kini.
“Abi mo, Mr. Guieb,” matud sa pari, “dugay na kong nakadawat og report gikan sa kadagkoan sa simbahan bahin nianang kulto nga Tambayawan. Naalerto na karon ang kaparian sa tibuok nasud gumikan sa tulin nga pagkaylap ning maong kalihokan. Apan wala ako magdahom nga nakasulod na diay ang Tambayawan dinhi sa Mabini. Wala pa ko’y nadawat nga report bahin niana.” -- Sumpayan pa