Anino sa Kulto

“Kombinsido na ako karon, Carlo,” matud sa hepe taliwala sa kahilom sa sekreta,” nga husto gyud ang imong katahap. Wala’y laing responsable sa nahitabong mga krimen dinhi sa Mabini kun dili ang mga sakop sa kulto. Ug gipatay nila si Dr. Castro tungod kay nasayod na tingali sila nga misuka na ang doktor kanato bahin sa mga tinagoan sa ilang tinuohan.”

“Husto ka nianang imong pangagpas, Dick,” sa detektib pa nga nakaagpas gilayon sa teyoriya sa hepe. “Mait-on ang mga sakop sa kulto, ilabi na gayod ang ilang supremo. Posibleng gipanid-an nila ang doktor ug nakita nila kini nga midangop kanimo ug kanako maong ila kining gipahilom aron wala na sila’y problema.”

“Anugon kaayo, Carlo,” sa hepe pa. “Magamit unta kaayo nato si Dr. Castro. Nagtuo ko nga duol na kita sa kasulbaran hinungdan nga gipahilom nila ang doktor nga maoy naghatag kanato og kasayoran.”

Wala motingog si Carlo. Igo lang siyang nakapanglingo.

“Angay na kitang mag-amping kanunay,” matud sa hepe nga ingon sa mibati’g kabalaka. “Malagmit nga nasayod na ang mga disipulo sa Tambayawan nga nagtinguha kita sa pagbungkag sa ilang pundok. Posibleng mohimo gayod sila’g lakang batok kanato. Ang problema kay wala kita nakaila niining mga tawhana.”

“Dili lang gyud kita mokompiyansa, Dick,” ni Carlo pa. Wala mosumpay ang hepe sa gisulti sa sekreta.

“Tuod,” ni Carlo pa. “Gikasulti mo na ba ang mga anak sa biktima?”

“Ang ginganlan og Annabelle lang maoy nakig-atubang nako,” tubag sa hepe.

Biyudo na si Dr. Castro. Ang iyang mga anak maoy kauban niini sa balay.

“Wala sila’y kasayoran sa nahitabo, Carlo,” matud na usab sa hepe. “Kaganina lang nila madiskubrehi nga patay na ang ilang amahan. Abtik gyud ang mga kriminal. Walay usa sa mga anak ni Dr. Castro nga nakamatikod nga may mga tawong daotan na nakasulod sa ilang balay kagabii.” -- Sumpayan pa