Hinog sa punoan

Misunod usab pagkaabli ang pultahan sa tuong kilid sa sakyanan. Nanaog ang usa ka babaye nga nagsul-ob usab og sunglasses. Maanyag usab kini. Is-is kaayo ang pamanit. Ala-Angel Locsin ang beauty niini.

“Maayong palis,” nangatahoran ang lalaki nga miduol sa nahimutangan nila ni Urielle ug Nelson. Apan wala kini mosaka sa may kayda. Nagpabilin kining nagbarog didto sa tugkaran sa balay. Ang babayeng kuyog niini nagpaantaw lang kanila.

“M-maayong palis usab, Sir Patrick, mibalos pagtimbaya si Urielle ngadto sa anak sa agalon sa iyang mga ginikanan.

“May bisita ka man diay,” nagkanayon ang lalaki nga nagpahiyom.

“Oo, Sir,” ni Urielle. “S-si Nelson.”

Nangatahoran usab si Nelson ngadto ni Patrick. Mibalos usab kini pagtimbaya sa ulitawo.

“Mao na ba kana?” Si Urielle ang gipangutana ni Patrick.

“O-oo, Sir,” matahaon nga tubag ni Urielle sa pangutana ni Patrick nga ang buot ipasabot mao kun iya bang hinigugma si Nelson.

Miyango si Patrick uban ang pahiyom.

“Unsay akong ikaalagad nimo, Sir?” Sukit ni Urielle.

“Naa ba ang imong mga ginikanan?” Misumbalik pagpangutana si Patrick. -- Sumpayan pa