Hinog sa punoan

Naputol ang panagsulti nila ni Urielle ug Nelson sa may kayda sa dihang ilang nalantawan didto sa unahan ang usa ka sakyanan nga nagsingabot. Ang balay nila ni Urielle nahimutang sa dapit nga sudlonon og diyotay gikan sa highway apan masulod gihapon og sakyanan gumikan sa dalan-dalan nga namugna sa karomata nga mag-agian dinhi sa adlaw’ng tanan. Gawas lang sa panahon sa ting-ulan nga lapok kaayo ang maong dapit, dili masudlan og sakyanan ang maong lugar.

Apan karon kay ting-init man, yano rang makasulod-gawas ang sakyanan. Gani kun moanhi si Don Emilio Arcanghel, ang tag-iya sa yuta nga gisaupan sa mga ginikanan ni Urielle, ang sakyanan niini anha man gyud i-parking sa ilang tugkaran.

“Mora ma’g paingon dinhi kanang maong sakyanan,” buyag ni Nelson dihang nagkaduol na ang sakyanan.

“Sakyanan kana ni Sir Patrick,” nagkanayon si Urielle nga nakaila dayon sa tag-iya sa sakyanan nga nagsingabot. “Ang anak ni Don Emilio Arcanghel.”

“Mao ba?”

Nahilom sila dihang mihunong ang sakyanan nga kolor maroon sa tungod sa balay. Wala madugay, naabli ang pultahan sa walang kilid niini ug migawas ang usa ka lalaki nga nagsul-ob og sunglasses. Ambongan ang maong lalaki. Kun kalitan sa pagtan-aw, kaamgid gayod kini’g panagway sa aktor nga si Piolo Pascual. - Sumpayan pa