Akong uyab

Niay istorya nga dili gyod nako malimtan samtang ako may kinabuhi pa. Nahitabo kini niadtong naundang akog eskuyla tungod sa kawad-on, diin mibiya ako sa among lungsod. Milangyaw dinhi sa siyudad sa Sugbo aron sulayan ang pagpanimpalad.

Sa akong pagka estambay, wala tuyoa nga nakauyab ko’g taga bukid. Silingan sa akong ig-agaw nga taga South, kinsa mibisita lang sa ilaha, diin didto sab ko mag-abot. Guwapa. Puti. Lawas nindot. Gidala nakog sinehan. Didto gyod sa kinangitngitan nga suok. Akong gisulayag luok. Sus, lupig pay karatisyan. Haskang grabehang nakapanagang! Wa gyod koy nahimo. Nawong da niya maoy akong nahagkan. Wa gyod kahikap sa iyang dughan.

"Laina nimo, Dong, uy! Imo man lang kong binuangan. Maulaw na ko kay imo na kong nahagkan." Badlong sa hadlokan nga nagsige’g hapuhap sa iyang nawong. Pagka conservative!

Lahi kaayo ang dalaga sa bukid ug sa siyudad. Ang taga bukid defensive. Samtang ang taga siyudad very offensive. Naglagot ko. Wa na gyod ko mousab. Hangtod miuli na lang siya sa ilaha.

Dangtag pipila ka bulan sa iyang pagbiya, nakadawat kog love letter gikan niya. Wala na nako tubaga. May lain pang misunod. Aw, wala na nako basaha. Useless. Di, ba? I don't need words alone. But both, words and actions. Sa laktod, nawad-an na ko’g gana.

Hala, naunsa ba? Nga nianang pagka gabii, sa akong pagkatulog, gipukaw man ko sa kablit sa dako kaayong iring itom? Kalit lang nanindog akong mga balhibo. Labi na kay misamot kabugnaw ang kawayang sawog sa kusina nga maoy akong gihigdaan. Isog ang nagsigang mga mata sa iring. Nakita ang hait nga mga tango pagngiyaw. Ug dihang kupogan na unta ako niini, dali akong mitimbakuwas ug misiyagit sa kalisang taman sa ginhawa. Haskang grabeha nakong nakaatras!

Nakamata ang akong ig-agaw ug iyang asawa. Daling milayat ang iring sa busloton nga bentana. Wala na maabti sa kahayag dihang gipasiga na ang suga. Mao na lamay ilang nakita ang nagkadugo nakong tiil. Ambot, kun sa salog ba nga kawayan nako nakuha ang maong garas, o sa kuko sa iring? Nahadlok sila human nako istoryahi sa hitabo. Unya wala makapugong si Manang Saling pagbukhad sa iyang baba. Ug giyagyag ang tinuod nga pagkatawo niadtong akong uyab.

Sukad niadto, gibitayan namo’g lana ang mga bentana ug pultahan sa tibuok balay. Nag-aray sab mig Holy Water ug benenditahang krus sa among bungbong. (Kataposan)