Anino sa Kulto

“Maayo hinuon, Double-U-Seven,” nagkanayon si Z sa pikas tumoy sa linya. “Basin pag two birds in one stone ang imong makuha nianang kalakiha.”

Sayo sa buntag sa sunod adlaw. Maoy namat-an ni Carlo ang sagunson nga bagting sa iyang cellphone nga gipatong sa gamay’ng lamesita duol sa ulohan sa gihigdaan niyang kama. Miutong ang pagkuriring niini nga iyang gibutang sa type 20 nga ringtone. Nagsonata sa pagbagting ang cellphone.

Gikawhat ni Carlo ang cellphone. Apan nagpabilin siyang naghigda. Gitamdan niya ang screen sa caller ID aron pagsuta kun kinsay nanawag. Maoy milutaw ang numero sa cellphone ni Maj. Dick Campo. Nakasukot siya sa iyang kaugalingon kun nganong sayo kaayong nanawag ang hepe kaniya.

Gipislit ni Carlo ang ok button sa cellphone dayong paod niini sa iyang tuong dalunggan. Mitakilid siya’g diyotay sa paghigda.

“Hello?” niya pa. “Dick, ikaw ni?”

“Oo, Carlo,” ni Maj. Campo didto sa pikas linya. “Maayo kay nagmata kana.”

“Sayo ka man kaayong nanawag?” matud ni Carlo nga wala makapugong pagpadayag sa iyang kahibulong. “Unsa bay problema, ha?”

“May daotang nahitabo,” matud sa hepe nga ingon sa nabalisa pag-ayo.

“U-unsa?” nakugang si Carlo. “K-kay unsa man diay nahitabo?”

“Si Dr. Castro,” sa hepe pa sa tingog nga nagsipit og kahinugon,” gipatay kagabii.”

“Unsa?” Daw gipabuthan si Carlo og kapid-an ka mga dinamita.

“Mao kana, Carlo,” sa hepe. “Gipahibalo kami sa iyang anak bahin sa nahitabo kaniya. On the way na kami karon paingon sa iyang pinuy-anan.”

Moagpas ko ninyo, Dick” matud ni Carlo.

“Labing maayo hinuon kun makaadto ka usab,” daling sumpay sa hepe.

“Paaboton ka namo. Aw, nakatultol ka ba sa dapit?” “Yes, Dick,” maoy tubag. -- Sumpayan pa